ప్రకృతిని కాపాడుకోవడం అంటే మన భవిష్యత్తును మనం సురక్షితం చేసుకోవడమేనని, పర్యావరణ పరిరక్షణ ప్రతి ఒక్కరి సామాజిక బాధ్యత అని చిట్వేలి పీఎం శ్రీ జిల్లా పరిషత్ ఉన్నత పాఠశాల ప్రధానోపాధ్యాయులు బి. దుర్గరాజు పేర్కొన్నారు. శుక్రవారం ప్రపంచ పర్యావరణ దినోత్సవాన్ని పురస్కరించుకుని పాఠశాల ఎన్సీసీ ట్రూప్ ఆధ్వర్యంలో పర్యావరణ పరిరక్షణ సదస్సు, మొక్కలు నాటే కార్యక్రమాన్ని అత్యంత ఉత్సాహభరితంగా నిర్వహించారు. హెచ్ఎం దుర్గరాజు, ఎన్సీసీ అధికారి పసుపుల రాజశేఖర్ ఈ వేడుకలను ప్రారంభించారు.
-భవిష్యత్తు కోసం.. ప్రకృతి స్ఫూర్తితో:
ఈ సందర్భంగా ఎన్సీసీ అధికారి పసుపుల రాజశేఖర్ మాట్లాడుతూ.. ఈ ఏడాది ప్రపంచ పర్యావరణ దినోత్సవం యొక్క ముఖ్య ఉద్దేశం “ప్రకృతి స్ఫూర్తితో – వాతావరణం కోసం, మన భవిష్యత్తు కోసం” అనే అంశాన్ని ప్రతి ఒక్కరూ ఆచరణలోకి తేవాలన్నారు. ప్రపంచాన్ని పీడిస్తున్న వాతావరణ మార్పుల తీవ్రతను తగ్గించడంలో మరియు గ్లోబల్ వార్మింగ్ను అరికట్టడంలో యువత, విద్యార్థి లోకం కీలక పాత్ర పోషించాలని పిలుపునిచ్చారు. విద్యార్థి దశ నుంచే చెట్లను నాటడం, నీటిని పొదుపుగా వాడటం మరియు ప్లాస్టిక్ రహిత జీవన విధానాన్ని అలవరచుకోవడం వంటి అలవాట్లను పెంపొందించుకోవాలని సూచించారు.
-కదం తొక్కిన ఎన్సీసీ క్యాడెట్లు, గైడ్స్:
కార్యక్రమంలో భాగంగా ఎన్సీసీ క్యాడెట్లతో పాటు గైడ్స్ విద్యార్థినులు పాఠశాల ప్రాంగణంలో విస్తృతంగా ‘శ్రమదానం’ నిర్వహించి, పిచ్చిమొక్కలను తొలగించి శుభ్రం చేశారు. అనంతరం పాఠశాల ఆవరణలో పలు రకాల నీడను ఇచ్చే, పూల మొక్కలను నాటి నీరు పోశారు. ఈ సందర్భంగా పర్యావరణానికి ఎటువంటి హాని తలపెట్టబోమని, భూమిని పచ్చదనంతో నింపేందుకు నిరంతరం కృషి చేస్తామని విద్యార్థులందరూ కలిసి సామూహిక ప్రతిజ్ఞ చేశారు.
ఈ హరిత వేడుకల్లో పాఠశాల సీనియర్ ఉపాధ్యాయులు కందల హరినాథ్, సీఆర్పీ చంద్ర, కిరణ్ కుమార్ రాజు, వెంకట్ రెడ్డి మరియు పెద్ద సంఖ్యలో విద్యార్థిని విద్యార్థులు పాల్గొని పర్యావరణ దినోత్సవాన్ని విజయవంతం చేశారు.
