ద్రౌపతీ సమేత ధర్మరాజు స్వామి బ్రహ్మోత్సవాల వాల్ పోస్టర్ ఆవిష్కరణ

శ్రీ కాళహస్తి, జులై 09 : (పున్నమి న్యూస్) : శ్రీకాళహస్తీశ్వర స్వామి దేవస్థాన అనుబంధ ఆలయమైన ద్రౌపతీ సమేత ధర్మరాజు స్వామి వార్షిక బ్రహ్మోత్సవాల ఆహ్వాన పత్రిక, వాల్ పోస్టర్లను నియోజకవర్గ శాసనసభ్యులు బొజ్జల వెంకట సుధీర్ రెడ్డి ఆవిష్కరించారు. ఆలయ ప్రాంగణంలో గురువారం జరిగిన ఈ కార్యక్రమంలో ఆలయ అధికారులు, ధర్మకర్తల మండలి సభ్యులు, కూటమి నేతలు తమ కుటుంబ సభ్యులతో కలిసి పాల్గొన్నారు. ఈ సందర్భంగా శాసనసభ్యులు మాట్లాడుతూ జులై 17 నుండి జులై 29 వరకు స్వామివారి బ్రహ్మోత్సవాలు వైభవంగా జరగనున్నట్లు ప్రకటించారు. పట్టణంలో ఎంతో ప్రసిద్ధి చెందిన ఈ ఉత్సవాలలో ధ్వజారోహణము, ద్రౌపతీ కళ్యాణము, అర్జున తపస్సు, అగ్నిగుండ ప్రవేశము వంటి ఘట్టాలు ఎంతో విశేషమైనవని పేర్కొన్నారు. ఈ పవిత్ర మహోత్సవాలలో భక్తులు పెద్ద సంఖ్యలో పాల్గొని స్వామి, అమ్మవార్ల కృపాకటాక్షాలకు పాత్రులు కావాలని కోరారు. ఉత్సవాలకు వచ్చే భక్తులకు ఎలాంటి ఇబ్బందులు కలగకుండా అన్ని ఏర్పాట్లు పూర్తి చేయాలని అధికారులను ఆదేశించారు.