కేజీబీవీలో బాలికలకు భద్రతపై అవగాహన …..శక్తి యాప్‌, గుడ్ టచ్ – బ్యాడ్ టచ్‌పై ఎస్సై వినోద్ కుమార్ సూచనలు

చిట్వేల్ పోలీస్ స్టేషన్ పరిధిలోని కస్తూర్బా గాంధీ బాలికా విద్యాలయం (KGBV)ను గురువారం ఎస్. వినోద్ కుమార్ సందర్శించి విద్యార్థినులకు విస్తృత అవగాహన కార్యక్రమం నిర్వహించారు. ఈ సందర్భంగా బాలికల భద్రత, సామాజిక బాధ్యతలపై పలు కీలక అంశాలను సులభంగా అర్థమయ్యే రీతిలో వివరించారు. శక్తి యాప్ వినియోగ విధానం, బాల్యవివాహాల నివారణ అవసరం, ఆత్మహత్యల వంటి ప్రమాదకర ఆలోచనల నుంచి బయటపడే మార్గాలు, ఈవ్‌టీీజింగ్‌ – ర్యాగింగ్‌లపై చట్టపరమైన చర్యలు, అత్యవసర సమయంలో డయల్ చేయాల్సిన ముఖ్య నంబర్లు, అలాగే గుడ్ టచ్ – బ్యాడ్ టచ్ అంశాలపై విద్యార్థినులకు స్పష్టమైన అవగాహన కల్పించారు. విద్యార్థినులు తమకు ఎదురయ్యే సమస్యలను భయపడకుండా ఉపాధ్యాయులు, పోలీసుల దృష్టికి తీసుకురావాలని, అవసరమైనప్పుడు వెంటనే పోలీసు సహాయం కోరాలని సూచించారు. మహిళలు, బాలికల రక్షణలో శక్తి యాప్ కీలక పాత్ర పోషిస్తుందని ఎస్సై వినోద్ కుమార్ తెలిపారు. ఈ కార్యక్రమంలో పాఠశాల సిబ్బంది, విద్యార్థినులు పాల్గొని అవగాహన సదస్సును విజయవంతం చేశారు.