కాకినాడ, సెప్టెంబరు 28 (పున్నమి ప్రతినిధి): తుఫాను ప్రభావంతో పెదపూడి మండలంలో ఏర్పడుతున్న ముంపు సమస్యకు శాశ్వత పరిష్కారం చూపడమే లక్ష్యమని అనపర్తి ఎమ్మెల్యే నల్లమిల్లి రామకృష్ణారెడ్డి తెలిపారు. కాకినాడ కలెక్టరేట్లో కలెక్టర్ హరేంద్ర ప్రసాద్ ఐఏఎస్ సమక్షంలో డ్రైన్స్, ఇరిగేషన్, వ్యవసాయ, రెవెన్యూ శాఖల అధికారులతో ముంపు సమస్యపై సమీక్షించారు. బిక్కవోలు డ్రైన్, ఇతర చిన్న డ్రైన్లు, వెస్ట్ ఏలేరు డ్రైన్లను డ్రెడ్జింగ్ చేయాల్సిన అవసరం ఉందన్నారు. గోదావరి డెల్టా ఆధునికీకరణకు ప్రభుత్వం చర్యలు చేపడుతోందని తెలిపారు. పెదపూడి ముంపుపై సమగ్ర నివేదిక రూపొందించి ప్రభుత్వానికి పంపనున్నట్లు పేర్కొన్నారు. అధికారులు, కూటమి నాయకులు పాల్గొన్నారు.
