పున్నమి న్యూస్
“పని చేస్తే చేయండి… లేకపోతే వెళ్ళిపోండి”
హైడ్రా సిబ్బందిపై రంగనాథ్ అహంకార ధోరణి..?
తక్కువ జీతాలు, అధిక పనిభారం.. ఉద్యోగుల్లో తీవ్ర అసంతృప్తి
హైదరాబాద్, జూన్ 13: హైడ్రా (HYDRAA) సిబ్బందితో నిర్వహించిన సమావేశంలో ఉన్నతాధికారి రంగనాథ్ చేసిన వ్యాఖ్యలు ప్రస్తుతం తీవ్ర చర్చనీయాంశంగా మారాయి. జలవిహార్లో నిన్న నిర్వహించిన సమావేశంలో సిబ్బంది తమ సమస్యలను అధికారుల దృష్టికి తీసుకెళ్లగా, వారికి సరైన సమాధానాలు ఇవ్వకుండా నిర్లక్ష్యంగా, అహంకారపూరితంగా స్పందించారనే ఆరోపణలు వినిపిస్తున్నాయి.
సమావేశంలో ఒక ఉద్యోగి మాట్లాడుతూ, గత బీఆర్ఎస్ ప్రభుత్వ హయాంలో నెలకు రూ.22 వేల వేతనం చెల్లించేవారని, ప్రస్తుతం కేవలం రూ.17 వేలే ఇస్తున్నారని, అదే స్థాయిలో వేతనాలు పెంచాలని కోరాడు. దీనికి స్పందించిన రంగనాథ్, “పని చేస్తే చేయండి… లేకపోతే వెళ్ళిపోండి” అంటూ వ్యాఖ్యానించినట్లు సమాచారం.
అంతేకాకుండా, “బయట ఉద్యోగాలు లేవు. ఈ ఉద్యోగం కూడా వదిలేస్తే రోడ్డున పడతారు” అని ఉద్యోగులను హెచ్చరించినట్లు సిబ్బంది చెబుతున్నారు. ఈ వ్యాఖ్యలు ఉద్యోగుల్లో తీవ్ర అసంతృప్తికి కారణమయ్యాయి.
ఎన్నికల వరకు ఆశలు పెట్టుకోవద్దు
జీతాల పెంపుపై ప్రశ్నించిన ఉద్యోగులకు, “ఎన్నికల ముందు ప్రభుత్వం జీతాలు పెంచవచ్చు. అప్పటి వరకు ఎలాంటి ఆశలు పెట్టుకోవద్దు” అని సమాధానం ఇచ్చినట్లు సమావేశంలో పాల్గొన్న సిబ్బంది పేర్కొంటున్నారు.
సొంత వాహనాలతోనే విధులకు వెళ్లాలా?
హైడ్రా వాహనాలు అందుబాటులో లేకపోయినా, సిబ్బంది తమ సొంత వాహనాల్లో పరికరాలు తీసుకుని విధులకు వెళ్లాలని ఆదేశించారనే ఆరోపణలు ఉన్నాయి. ఇది ఉద్యోగులపై అదనపు ఆర్థిక భారం మోపుతున్నదని వారు ఆవేదన వ్యక్తం చేస్తున్నారు.
సమయానికి రాకపోతే ఉద్యోగాలపై వేటు
విధులకు రెండు సార్లకంటే ఎక్కువ ఆలస్యంగా హాజరైతే ఉద్యోగం నుంచి తొలగిస్తామని హెచ్చరించినట్లు కూడా సమాచారం. ఇప్పటికే తక్కువ జీతాలు, అధిక పనిభారం, కఠిన నిబంధనలతో ఇబ్బందులు పడుతున్న సిబ్బంది ఈ హెచ్చరికలతో మరింత ఆందోళన చెందుతున్నారు.
రాజీనామాల బాటలో సిబ్బంది
ఎండా, వానా లెక్కచేయకుండా ప్రజాసేవలో పనిచేస్తున్న తమతో ఇలా మాట్లాడటం బాధాకరమని పలువురు ఉద్యోగులు ఆవేదన వ్యక్తం చేస్తున్నారు. రంగనాథ్ వ్యవహారశైలితో విసిగిపోయిన కొందరు సిబ్బంది ఇప్పటికే ఉద్యోగాలకు రాజీనామా చేసి వెళ్లిపోయారని సమాచారం.
సిబ్బంది డిమాండ్
తమకు తగిన వేతనాలు, కనీస సౌకర్యాలు కల్పించడంతో పాటు గౌరవప్రదంగా వ్యవహరించాలని హైడ్రా సిబ్బంది ప్రభుత్వాన్ని కోరుతున్నారు. అధికారుల అహంకార ధోరణి కొనసాగితే మరింత మంది ఉద్యోగులు రాజీనామా చేసే పరిస్థితి ఏర్పడుతుందని వారు హెచ్చరిస్తున్నారు.
— పున్నమి న్యూస్ ప్రత్యేక కథనం
