ఖమ్మం ఆగష్టు
(పున్నమి న్యూస్)
అంతర్జాతీయ స్నేహితుల దినోత్సవాన్ని పురస్కరించుకుని జిల్లా వ్యాప్తంగా ఆదివారం వేడుకలు ఘనంగా నిర్వహించారు. చిన్నారుల నుంచి యువత వరకు, ప్రజాప్రతినిధులు, రాజకీయ, సామాజిక, స్వచ్ఛంద సంస్థల నాయకులు తమ స్నేహితులతో కలిసి ఈ వేడుకలను ఆనందంగా జరుపుకున్నారు. ఒకరినొకరు కలుసుకుని పుష్పగుచ్ఛాలు, బహుమతులు అందించడంతో పాటు సామాజిక మాధ్యమాల వేదికగా స్నేహితుల దినోత్సవ శుభాకాంక్షలు తెలియజేశారు. యువకులు తమ పాత జ్ఞాపకాలను గుర్తుచేసుకుంటూ స్నేహితులతో ప్రత్యేకంగా గడిపారు. పలువురు రాజకీయ, సామాజిక నేతలు స్నేహం అనేది జీవితంలో అత్యంత విలువైన బంధమని పేర్కొంటూ అందరికీ స్నేహితుల దినోత్సవ శుభాకాంక్షలు తెలిపారు. జిల్లాలోని పలు ప్రాంతాల్లో స్నేహితుల సమావేశాలు, కేక్ కటింగ్ కార్యక్రమాలు నిర్వహించగా, సోషల్ మీడియాలో శుభాకాంక్షల సందేశాలు, ఫోటోలు, వీడియోలు విస్తృతంగా వైరల్ అయ్యాయి. స్నేహానికి గుర్తుగా అనేక మంది మొక్కలు నాటడం, సేవా కార్యక్రమాలు నిర్వహించడం విశేషంగా నిలిచింది.
