Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: అనకాపల్లి జిల్లా

అనకాపల్లి

రోడ్డు ప్రమాదాల నివారణే లక్ష్యం.. ట్రాఫిక్ నిబంధనలపై పోలీసుల అవగాహన

అనకాపల్లి: తుమ్మపాల గ్రామ రహదారి, కొత్తూరు జంక్షన్‌ వద్ద వాహనదారులకు రహదారి భద్రత, ట్రాఫిక్ నిబంధనలపై పోలీసులు అవగాహన కల్పించారు. ట్రాఫిక్ పోలీస్ స్టేషన్ ఇన్‌స్పెక్టర్ కె. నాగేశ్వరరావు ఆధ్వర్యంలో ఆదివారం నిర్వహించిన ఈ కార్యక్రమంలో ట్రాఫిక్ ఎస్‌ఐలు అర్జునరావు, సత్యనారాయణ పాల్గొన్నారు. గతంలో జరిగిన రోడ్డు ప్రమాదాలను ఉదాహరణలుగా వివరిస్తూ, ప్రమాదాల నివారణకు తీసుకోవాల్సిన జాగ్రత్తలను వాహనదారులకు తెలియజేశారు. ద్విచక్ర వాహనదారులు తప్పనిసరిగా హెల్మెట్ ధరించాలని, మద్యం సేవించి వాహనాలు నడపకూడదని పోలీసులు సూచించారు. అతివేగం, ట్రిపుల్ రైడింగ్‌కు దూరంగా ఉండాలని, మైనర్లకు వాహనాలు ఇవ్వకూడదని స్పష్టం చేశారు. ట్రాఫిక్ సిగ్నల్స్‌ను పాటిస్తూ, రహదారి భద్రతా నియమాలను ప్రతి ఒక్కరూ బాధ్యతగా అనుసరించాలని కోరారు. నిబంధనల ఉల్లంఘన వల్ల ప్రమాదాలు జరిగి విలువైన ప్రాణాలు కోల్పోయే ప్రమాదం ఉందని హెచ్చరించారు. వాహనదారులు అప్రమత్తంగా వ్యవహరించి ట్రాఫిక్ నియమాలను పాటిస్తే రోడ్డు ప్రమాదాలను గణనీయంగా తగ్గించవచ్చని పోలీసులు పేర్కొన్నారు.

అనకాపల్లి

యలమంచిలి 22వ వార్డులో బీజేపీ జోరు.. నామినేషన్‌కు సిద్ధమైన మాజీ సైనికుడు నక్కా శివ శంకరరావు!

యలమంచిలి మున్సిపాలిటీలో ఎన్నికల సందడి నెలకొంది. 22వ వార్డు కౌన్సిలర్ స్థానానికి భారతీయ జనతా పార్టీ (బీజేపీ) అభ్యర్థిగా మాజీ సైనికుడు నక్కా శివ శంకరరావు ఆదివారం నామినేషన్ దాఖలు చేయనున్నారు. ఈ సందర్భంగా ఆదివారం ఉదయం 11:30 గంటలకు నామినేషన్ కార్యక్రమం నిర్వహించేందుకు ఏర్పాట్లు చేశారు. ఆయన నామినేషన్ నేపథ్యంలో పార్టీ నాయకులు, కార్యకర్తలు, అభిమానులు, శ్రేయోభిలాషుల్లో ఉత్సాహం నెలకొంది.దేశ రక్షణలో సైనికుడిగా సేవలందించిన నక్కా శివ శంకరరావు, అదే క్రమశిక్షణ, నిబద్ధతతో ప్రజలకు సేవ చేయాలనే లక్ష్యంతో ఎన్నికల బరిలోకి దిగుతున్నట్లు ఆయన అభిమానులు తెలిపారు. ప్రధాని నరేంద్ర మోదీ, కేంద్ర హోంమంత్రి అమిత్ షా నాయకత్వంతో పాటు అనకాపల్లి ఎంపీ సీఎం రమేష్, యలమంచిలి ఎమ్మెల్యే సుందరపు విజయ్ కుమార్, మాజీ చైర్‌పర్సన్ పిళ్లా రమాకుమారి, విశాఖ డెయిరీ చైర్మన్ పిళ్లా ఆనంద్ కుమార్ తదితర నాయకుల స్ఫూర్తితో ముందుకు సాగుతున్నట్లు పేర్కొన్నారు.22వ వార్డులో స్థానిక సమస్యల పరిష్కారం, ప్రజలకు అందుబాటులో ఉంటూ సేవలందించడం లక్ష్యంగా ఆయన ఎన్నికల్లో పోటీ చేస్తున్నట్లు అనుచరులు వెల్లడించారు. నామినేషన్ కార్యక్రమానికి పార్టీ శ్రేణులు, అభిమానులు పెద్ద సంఖ్యలో హాజరుకావాలని కోరారు. ప్రజల ఆశీస్సులు, కార్యకర్తల సహకారంతో ఎన్నికల ప్రక్రియలో ముందుకు సాగుతామని తెలిపారు.

అనకాపల్లి

అయోధ్య రామయ్య పాదుకలకు ఏటికొప్పాకలో ఘన స్వాగతం

భక్తి పారవశ్యంలో ఏటికొప్పాక.. వైభవంగా రాములవారి పాదుకల ఊరేగింపు ఏటికొప్పాక: అయోధ్య రామాలయం నుంచి శ్రీరాములవారి పాదుకలు మన ఏటికొప్పాక గ్రామానికి చేరుకోవడంతో గ్రామమంతా ఆధ్యాత్మిక శోభను సంతరించుకుంది. ఈ సందర్భంగా శనివారం సాయంత్రం 6 గంటల నుంచి గ్రామంలో శ్రీరాములవారి పాదుకల ఊరేగింపును అత్యంత వైభవంగా నిర్వహించారు.శ్రీరామ నామస్మరణలు, భక్తుల జై శ్రీరామ్ నినాదాలతో గ్రామ వీధులు మార్మోగాయి. చెట్టు భజన, హరిభజన, తప్పెట్ల వాయిద్యాల నడుమ భక్తులు, గ్రామ ప్రజలు పెద్ద సంఖ్యలో పాల్గొని ఊరేగింపును భక్తిశ్రద్ధలతో కొనసాగించారు. పాదుకల దర్శనం కోసం భక్తులు ఆసక్తిగా తరలివచ్చారు. గ్రామమంతా పండుగ వాతావరణం నెలకొనగా, భక్తుల ఆనందోత్సాహాలు ప్రత్యేక ఆకర్షణగా నిలిచాయి.గ్రామ ప్రజలు, భక్తుల సమిష్టి భాగస్వామ్యంతో ఈ ఆధ్యాత్మిక కార్యక్రమం అత్యంత ఘనంగా, విజయవంతంగా ముగిసింది. శ్రీరాములవారి పాదుకలు ఏటికొప్పాకకు రావడం గ్రామానికి ఎంతో విశేషమైన ఆధ్యాత్మిక ఘట్టంగా భక్తులు భావించారు.

అనకాపల్లి

తల్లిదండ్రులను కోల్పోయిన చిన్నారులకు రూ.50 వేల ఆర్థిక సాయం

అచ్యుతాపురం: తల్లిదండ్రులను కోల్పోయి అనాథలుగా మారిన ఇద్దరు చిన్నారులకు సీఐటీయూ అనుబంధ యూనియన్ అండగా నిలిచింది. అచ్యుతాపురం మండలం ఖాజీపాలెం గ్రామానికి చెందిన వివోఏ కూనిశెట్టి రేణుక, ఆమె భర్త నానాజీ అకాల మరణంతో పిల్లలు ఒంటరిగా మిగిలారు. ఈ పరిస్థితిని దృష్టిలో ఉంచుకుని వెలుగు యానిమేటర్స్‌ వివోఏ యూనియన్‌ సీఐటీయూ అనుబంధ కార్పస్‌ ఫండ్‌ నుంచి రూ.50 వేల ఆర్థిక సహాయాన్ని అందించారు. ఇద్దరు చిన్నారుల పేర్లపై చెక్కును అందజేశారు.కష్టకాలంలో చిన్నారులకు ఆర్థిక భరోసా కల్పించేందుకు ఈ సహాయం అందించినట్లు యూనియన్‌ నాయకులు తెలిపారు. చిన్నారుల భవిష్యత్తుకు ఈ సాయం కొంతవరకు తోడ్పడుతుందని పేర్కొన్నారు.ఈ కార్యక్రమంలో ఐకేపీ యూనియన్‌ మండల కార్యదర్శి పిల్లా లావణ్య, నాయకులు ఎస్. రమణ, సీఐటీయూ జిల్లా కార్యదర్శి ఆర్. రాము, మండల కన్వీనర్‌ కె. సోమునాయుడు పాల్గొన్నారు.

అనకాపల్లి

యలమంచిలి చైర్‌పర్సన్ బరిలో పిల్లా రమాకుమారి.. కూటమి అభ్యర్థిగా నామినేషన్

యలమంచిలి మున్సిపాలిటీ రెండో సాధారణ ఎన్నికల్లో చైర్‌పర్సన్ పదవికి కూటమి అభ్యర్థిగా బీజేపీకి చెందిన మున్సిపల్ మాజీ చైర్‌పర్సన్ పిల్లా రమాకుమారి శనివారం నామినేషన్ దాఖలు చేశారు. మున్సిపల్ ఎన్నికల అధికారి కె. వరహాలకు తన నామినేషన్ పత్రాలను అందజేశారు.ఈ సందర్భంగా స్థానిక విలేకరులతో ఆమె మాట్లాడుతూ, తన తల్లి ఆశీర్వాదంతో నామినేషన్ దాఖలు చేసినట్లు తెలిపారు. తనకు ఈ అవకాశం కల్పించిన ప్రధానమంత్రి నరేంద్ర మోదీ, ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్, బీజేపీ రాష్ట్ర అధ్యక్షుడు మాధవ్‌కు ప్రత్యేక ధన్యవాదాలు తెలిపారు.మరోసారి చైర్‌పర్సన్‌గా అవకాశం కల్పిస్తే యలమంచిలి మున్సిపాలిటీ అభివృద్ధికి మరింత కృషి చేస్తానని రమాకుమారి పేర్కొన్నారు. పట్టణ ప్రజలకు మెరుగైన సేవలు అందించడంతో పాటు అభివృద్ధి కార్యక్రమాలను ముందుకు తీసుకెళ్లేందుకు కృషి చేస్తానని తెలిపారు.ఈ కార్యక్రమంలో మల్ల కొండబాబు తదితరులు పాల్గొన్నారు.

అనకాపల్లి

ఏటికొప్పాక లక్క బొమ్మల తయారీ కేంద్రాన్ని సందర్శించిన ఎన్జీవో సంఘాల నేతలు ..

​యలమంచిలి :మండలంలోని ఏపీ ఎన్‌జీఓ రాష్ట్ర అధ్యక్షులు, ఏపీ జేఏసీ చైర్మన్ అలపర్తి విద్యాసాగర్, రాష్ట్ర ప్రధాన కార్యదర్శి డి.వి. రమణ శనివారం యలమంచిలి మండలం ఏటికొప్పాక గ్రామంలో పర్యటించారు. ఈ పర్యటనలో భాగంగా రాష్ట్ర ఉపాధ్యక్షులు ఆర్. రవిశంకర్, అనకాపల్లి ఏపీ ఎన్జీవో అధ్యక్షులు పీలా రవితో కలిసి వారు ప్రముఖ హస్తకళాకారుడు, రాష్ట్రపతి అవార్డు గ్రహీత శ్రీశైలపు చిన్నాయాచారికి చెందిన లక్క బొమ్మల తయారీ కేంద్రాన్ని సందర్శించారు. ​అనంతరం వారు లక్క బొమ్మల తయారీ విధానాన్ని స్వయంగా పరిశీలించారు. ఈ సందర్భంగా స్థానిక హస్తకళాకారులతో సమావేశమై వారు ఎదుర్కొంటున్న వివిధ సమస్యలను అడిగి తెలుసుకున్నారు. కళాకారులు తెలిపిన సమస్యలపై నేతలు సానుకూలంగా స్పందిస్తూ, వాటిని సంబంధిత ఉన్నతాధికారులు మరియు ప్రభుత్వం దృష్టికి తీసుకువెళ్లి త్వరితగతిన పరిష్కారమయ్యేలా కృషి చేస్తామని హామీ ఇచ్చారు. ​ఈ కార్యక్రమంలో యలమంచిలి తాలూకా యూనిట్ ఏపీ ఎన్జీవో ఉపాధ్యక్షులు బండారు ప్రేమ్ కుమార్, నక్కపల్లి ఏపీ ఎన్జీవో అధ్యక్షులు శ్రీనుతో పాటు పలువురు ఉద్యోగ సంఘాల ప్రతినిధులు, నాయకులు పాల్గొన్నారు.

అనకాపల్లి

పెదపల్లి వార్డు టీడీపీ అభ్యర్థిగా బొద్ధపు లలిత నామినేషన్

యలమంచిలి మున్సిపాలిటీ రెండో సాధారణ ఎన్నికల్లో భాగంగా పెదపల్లి వార్డు కౌన్సిలర్ అభ్యర్థిగా బొద్ధపు లలిత శనివారం నామినేషన్ దాఖలు చేశారు. పెదపల్లి వార్డు టీడీపీ అధ్యక్షుడు, మాజీ కోఆప్షన్ సభ్యుడు బొద్ధపు నాగేశ్వరరావు సతీమణి లలిత తన అనుచరులతో కలిసి గ్రామం నుంచి ర్యాలీగా బయలుదేరి మున్సిపల్ కార్యాలయానికి చేరుకున్నారు. అనంతరం ఎన్నికల అధికారులకు నామినేషన్ పత్రాలను సమర్పించారు.ఈ సందర్భంగా బొద్ధపు నాగేశ్వరరావు మాట్లాడుతూ, ప్రజలకు ఎల్లప్పుడూ అందుబాటులో ఉంటూ వారి సమస్యల పరిష్కారానికి కృషి చేస్తున్నానని తెలిపారు. వార్డు అభివృద్ధికి తన వంతు సహకారం అందిస్తూ ప్రజాసేవకు ప్రాధాన్యమిస్తున్నానని పేర్కొన్నారు.ఈ కార్యక్రమంలో బొద్ధపు అప్పారావు, కరణం వెంకటరావు, శ్రీను, నానాజీ, దంట్ల విజయ్ కుమార్, గొర్లె వాసు, గల్లా కన్నబాబు, జెర్రిపోతుల చిన్న, మామిడి గోవిందు తదితరులు పాల్గొన్నారు.

అనకాపల్లి

యలమంచిలిలో నామినేషన్ల జోరు.. రెండో రోజే 46 దాఖలు

యలమంచిలి: మున్సిపల్ ఎన్నికల నామినేషన్ల ప్రక్రియ రెండో రోజైన శనివారం ఊపందుకుంది. చైర్‌పర్సన్ స్థానంతో పాటు వివిధ వార్డులకు సంబంధించి ఒక్కరోజే మొత్తం 46 నామినేషన్లు దాఖలైనట్లు మున్సిపల్ కమిషనర్ బి.జె.ఎస్. ప్రసాద్ రాజు వెల్లడించారు.నామినేషన్ల దాఖలుతో యలమంచిలి మున్సిపాలిటీలో ఎన్నికల సందడి నెలకొంది. చైర్‌పర్సన్ పదవితో పాటు కౌన్సిలర్ స్థానాలకు పోటీ చేయాలనుకుంటున్న అభ్యర్థులు నామినేషన్లు సమర్పించడంతో రాజకీయ వర్గాల్లో ఆసక్తి పెరిగింది. వివిధ వార్డుల్లో పోటీకి సిద్ధమవుతున్న అభ్యర్థులు ఎన్నికల ప్రక్రియపై దృష్టి సారించారు. రెండో రోజు నామినేషన్ల స్వీకరణ ప్రక్రియను మున్సిపల్ అధికారులు నిర్వహించారు. ఈ ప్రక్రియ ప్రశాంత వాతావరణంలో ముగిసినట్లు అధికారులు తెలిపారు. రానున్న రోజుల్లో నామినేషన్ల దాఖలు మరింత పెరిగే అవకాశం ఉండటంతో అభ్యర్థులు, రాజకీయ పార్టీల నాయకులు ఎన్నికల పరిణామాలను ఆసక్తిగా గమనిస్తున్నారు. మొత్తంగా రెండో రోజే 46 నామినేషన్లు దాఖలు కావడంతో మున్సిపల్ ఎన్నికల సందడి మరింత పెరిగింది.

అనకాపల్లి

ఎలమంచిలిలో వైఎస్సార్‌సీపీ శక్తిప్రదర్శన.. భారీ ర్యాలీతో బొద్దపు తులసి–ఎర్రయ్య దొర నామినేషన్!

ఎలమంచిలి: మున్సిపల్ ఎన్నికల నేపథ్యంలో ఎలమంచిలిలో వైఎస్సార్‌సీపీ భారీ ర్యాలీ నిర్వహించి తన బలాన్ని ప్రదర్శించింది. మున్సిపల్ చైర్మన్ అభ్యర్థిగా బొద్దపు తులసి–ఎర్రయ్య దొర వైఎస్సార్‌సీపీ తరఫున నామినేషన్ దాఖలు చేశారు. ఎలమంచిలి నియోజకవర్గ సమన్వయకర్త కరణం ధర్మశ్రీ ఆధ్వర్యంలో, అనకాపల్లి జిల్లా వైఎస్సార్‌సీపీ అధ్యక్షుడు బొడ్డెడ ప్రసాద్, నియోజకవర్గ పరిశీలకుడు కోలా గురువులు సమక్షంలో నామినేషన్ కార్యక్రమం జరిగింది. ముందుగా పార్టీ కార్యాలయం నుంచి మున్సిపల్ కార్యాలయం వరకు నాయకులు, కార్యకర్తలు, అభిమానులు భారీగా తరలివచ్చి ర్యాలీ నిర్వహించారు. పార్టీ శ్రేణుల నినాదాల మధ్య ర్యాలీ ఉత్సాహంగా సాగింది. అనంతరం అభ్యర్థి మున్సిపల్ కార్యాలయంలో నామినేషన్ పత్రాలు దాఖలు చేశారు.ఈ కార్యక్రమంలో వైఎస్సార్‌సీపీ నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.

అనకాపల్లి

జనసేన చైర్‌పర్సన్ అభ్యర్థిగా నామినేషన్ వేసిన కర్రి ఝాన్సీ..

యలమంచిలి పురపాలక సంఘం రెండవ సాధారణ ఎన్నికల ప్రక్రియలో భాగంగా తొలిరోజు శుక్రవారం జనసేన పార్టీ చైర్‌పర్సన్ అభ్యర్థిగా కర్రి ఝాన్సీ తమ నామినేషన్ పత్రాలను దాఖలు చేశారు. జనసేన పార్టీలో మొదటి నుంచి క్రియాశీలకంగా వ్యవహరిస్తున్న ఆమెకు స్థానిక ఎమ్మెల్యే సుందరపు విజయ్‌కుమార్ ఆశీస్సులు పుష్కలంగా ఉండటంతో భారీ ఊరేగింపుగా వెళ్లి నామినేషన్ దాఖలు చేశారు. శుక్రవారం స్థానిక సౌభాగ్య అపార్ట్‌మెంట్ వద్ద నుంచి పార్టీ శ్రేణులతో కలిసి భారీ ర్యాలీగా బయలుదేరారు. పట్టణ ప్రధాన రహదారి మీదుగా సాగిన ఈ ర్యాలీ కోలాహలంగా మున్సిపల్ కార్యాలయానికి చేరుకుంది. అనంతరం ఎన్నికల రిటర్నింగ్ అధికారి, తహసీల్దార్ వరహాలకు కర్రి ఝాన్సీ తమ నామినేషన్ పత్రాలను అందజేశారు. పార్టీ ‘బి-ఫామ్’ పత్రాలను త్వరలోనే సమర్పిస్తామని ఈ సందర్భంగా ప్రతినిధులు తెలిపారు. ​ఈ సందర్భంగా కర్రి ఝాన్సీ మాట్లాడుతూ… ప్రజలకు నిరూపమానమైన సేవలు అందించాలనే దృక్పథంతోనే జనసేన పార్టీ తరఫున చైర్‌పర్సన్ అభ్యర్థిగా పోటీకి దిగానని చెప్పారు. పార్టీ పట్టణ అధ్యక్షుడు బొద్ధపు శ్రీను మాట్లాడుతూ, మొదటి నుంచి పార్టీ అభివృద్ధికి శ్రమిస్తున్న ఝాన్సీకి పార్టీ అధిష్ఠానం, నాయకత్వపు పూర్తి ఆశీస్సులు ఉన్నాయని పేర్కొన్నారు. ​ఈ కార్యక్రమంలో మాజీ ఎంపీపీ శేషు, పట్టణ అధ్యక్షుడు బొద్ధపు శ్రీను, నూకన్నదొర, శ్రీరామదాసు, రమేష్ నాయుడు, లోవరాజు, కొట్టారు శ్రీను, శేఖర్, లంక రాజు, నరేష్, గోపి, సత్యనారాయణతో పాటు జనసేన పార్టీ నాయకులు, శ్రేణులు, కార్యకర్తలు పెద్ద సంఖ్యలో పాల్గొన్నారు.