బక్రీద్ పండుగను పురస్కరించుకుని నాగర్ కర్నూల్ పట్టణంలో బహిరంగ ప్రదేశాలలో జంతు వధ చేయడం చట్టరీత్యా నేరమని మున్సిపల్ కమిషనర్ నాగిరెడ్డి ఒక ప్రకటనలో హెచ్చరించారు. పండుగను శాంతియుతంగా, నిబంధనలకు లోబడి జరుపుకోవాలని ఆయన పట్టణ ప్రజలకు విజ్ఞప్తి చేశారు.
సంబంధిత మున్సిపల్ అధికారుల ముందస్తు అనుమతి లేకుండా ఎలాంటి జంతు వధలు చేయకూడదని ఆయన స్పష్టం చేశారు. పట్టణ పరిశుభ్రతను, ప్రజారోగ్యాన్ని దృష్టిలో ఉంచుకుని ఈ నిర్ణయం తీసుకున్నట్లు కమిషనర్ తెలిపారు.
ఈద్గా వద్ద మున్సిపల్ ఏర్పాట్లు
ముస్లిం సోదరులు బక్రీద్ ప్రార్థనలు చేసుకోవడానికి వీలుగా డిగ్రీ కాలేజ్ సమీపంలోని ఈద్గా మైదానం వద్ద మున్సిపల్ కార్యాలయం తరఫున అన్ని రకాల ఏర్పాట్లు చేస్తున్నట్లు కమిషనర్ నాగిరెడ్డి వివరించారు. తాగునీరు, పారిశుధ్యం, విద్యుత్ దీపాల ఏర్పాటులో ఎలాంటి లోటుపాట్లు లేకుండా చర్యలు తీసుకుంటున్నట్లు ఆయన పేర్కొన్నారు. ప్రజలందరూ మున్సిపాలిటీ నిబంధనలకు కట్టుబడి, పండుగను ఆనందోత్సాహాల మధ్య జరుపుకోవాలని కోరారు.
