Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel
శ్రీ పొట్టి శ్రీరాములు నెల్లూరు

కావలి తూర్పు గోగులపల్లిలో & పడమర గోగులపల్లిలో ఉప్పు రైతుల కోసం రూ.349.50 కోట్లతో మట్టి రహదారుల నిర్మాణం

పున్నమి న్యూస్‌రూమ్ ప్రచురణ: నవీకరణ:
కావలి తూర్పు గోగులపల్లిలో & పడమర గోగులపల్లిలో ఉప్పు రైతుల కోసం రూ.349.50 కోట్లతో మట్టి రహదారుల నిర్మాణం

కావలి తూర్పు గోగులపల్లిలో & పడమర గోగులపల్లిలో ఉప్పు రైతుల కోసం రూ.349.50 కోట్లతో మట్టి రహదారుల నిర్మాణం
SPSR నెల్లూరు జిల్లా,కావలి నియోజకవర్గం లోని అల్లూరు మండలం తూర్పు గోగులపల్లి, పశ్చిమ గోగులపల్లి గ్రామ పంచాయతీలలో SC, ST, BC వర్గాలకు చెందిన ఉప్పు రైతుల ఉప్పు సాగు క్షేత్రాలకు మట్టి రహదారుల నిర్మాణానికి రూ.349.50 లక్షలు (రూ.3.495 కోట్లు) మంజూరు చేశారు. రాజ్యసభ సభ్యులు శ్రీ బీద మస్తాన్ రావు యాదవ్ చేసిన విజ్ఞప్తి మేరకు, ఆంధ్రప్రదేశ్ ఉప ముఖ్యమంత్రి శ్రీ కె. పవన్ కళ్యాణ్ గారి సహకారంతో పనులకు నిధులు సమకూర్చారు.
గోగులపల్లి గ్రామానికి భారత స్వాతంత్ర్యోద్యమ చరిత్రలో ప్రత్యేకమైన స్థానం ఉంది. సముద్రతీరానికి సమీపంలో ఉండటం, సంప్రదాయంగా ఉప్పు ఉత్పత్తి జరిగే ప్రాంతం కావడంతో 1930లో మహాత్మా గాంధీ పిలుపునిచ్చిన ఉప్పు సత్యాగ్రహం, శాసనోల్లంఘన ఉద్యమానికి నెల్లూరు జిల్లాలో గోగులపల్లి ఒక ముఖ్య కేంద్రంగా నిలిచింది.
గోగులపల్లి ప్రజలు బ్రిటిష్ ప్రభుత్వం విధించిన ఉప్పు చట్టాన్ని వ్యతిరేకిస్తూ సత్యాగ్రహంలో పాల్గొని, ఉప్పు తయారీ ద్వారా వలస పాలనకు వ్యతిరేకంగా అహింసాయుత నిరసనను వ్యక్తం చేశారు. ఈ ఉద్యమం ద్వారా గ్రామీణ ప్రజలు స్వరాజ్యం, స్వదేశీ, అహింస, శాసనోల్లంఘన వంటి జాతీయ భావాలతో మమేకమయ్యారు. నెల్లూరు జిల్లాలో ఈ ఉద్యమం కారణంగా అనేక మంది సత్యాగ్రహులు అరెస్టు కాగా, మహిళలు కూడా పెద్ద సంఖ్యలో పాల్గొన్నట్లు కేంద్ర ప్రభుత్వ చారిత్రక రికార్డులు పేర్కొంటున్నాయి.
ఈ ప్రాంతం యొక్క గాఢమైన చారిత్రక నేపథ్యానికి మరింత ప్రాధాన్యతను చేకూర్చే విధంగా, మహాత్మా గాంధీజీ 1933 డిసెంబర్ 30న తన కోస్తా ఆంధ్ర పర్యటనలో భాగంగా అల్లూరును సందర్శించడం ఒక చారిత్రక ఘట్టంగా నిలిచింది.
భారత ప్రభుత్వ చారిత్రక రికార్డులు నెల్లూరు జిల్లాలో ఉప్పు చట్టాన్ని ఉల్లంఘించిన ఉద్యమానికి మైపాడు, గోగులపల్లి, తుమ్మలపెంట, తడ, సుల్లూరుపేట, నావూరు, నాయుడుపేట వంటి గ్రామాలు ప్రధాన కేంద్రాలుగా ఉన్నాయని నమోదు చేశాయి.
నేడు ఈ ప్రాంతం భారత స్వాతంత్ర్యోద్యమ చరిత్ర, సంప్రదాయ తీరప్రాంత జీవనోపాధులు, ఉప్పు ఉత్పత్తి వారసత్వం—ఈ మూడు అంశాల సమ్మేళనం గోగులపల్లికి నెల్లూరు జిల్లా చరిత్రలో ప్రత్యేక గుర్తింపును కల్పించింది.
గోగులపల్లి తీర ప్రాంతానికి సమీపంలో ఉన్న గ్రామాలు కావడంతో ఇక్కడి ప్రజల్లో గణనీయమైన వర్గం ఉప్పు ఉత్పత్తిపై ఆధారపడి జీవనం సాగిస్తోంది. ఉప్పు క్షేత్రాలకు సరైన రహదారి సౌకర్యం లేకపోవడం వల్ల ఉప్పును క్షేత్రాల నుంచి నిల్వ కేంద్రాలకు, అక్కడి నుంచి మార్కెట్లకు తరలించడంలో రైతులు తీవ్ర ఇబ్బందులు ఎదుర్కొంటున్నారు. వాహనాలు, ట్రాక్టర్లు ఉప్పు క్షేత్రాల వద్దకు చేరుకోలేకపోవడం వల్ల రైతులు చేతులతో ఉప్పును తరలించాల్సి రావడం, రవాణా వ్యయం పెరగడం, వర్షాలు మరియు తీర ప్రాంత వాతావరణం కారణంగా ఉప్పు పాడయ్యే ప్రమాదం వంటి సమస్యలు ఎదురవుతున్నాయి.
రహదారి సౌకర్యం లేకపోవడం వల్ల రైతులు తమ ఉత్పత్తిని బహిరంగ మార్కెట్‌కు తీసుకెళ్లలేక, మధ్యవర్తులపై ఆధారపడాల్సి వస్తోందని, దీని కారణంగా తక్కువ ధరలకు ఉప్పును విక్రయించాల్సిన పరిస్థితి ఏర్పడుతోందని ఎంపీ బీద మస్తాన్ రావు యాదవ్ తన విజ్ఞప్తిలో పేర్కొన్నారు. కొత్త రహదారులు ఏర్పడితే ఉప్పు క్షేత్రాలకు వాహన రాకపోకలు సులభమై, మార్కెట్‌కు నేరుగా చేరుకునే అవకాశం పెరిగి, రైతులకు మెరుగైన ధర లభించే పరిస్థితులు ఏర్పడతాయి.
ఈ ప్రతిపాదనలో తూర్పు, పశ్చిమ గోగులపల్లి గ్రామ పంచాయతీల పరిధిలో మొత్తం 32 రహదారి పనులు, మొత్తం 18,900 మీటర్ల పొడవున, రూ.349.50 మంజూరు చేశారు. ఇందులో తూర్పు గోగులపల్లి పరిధిలో 24 పనులకు 13,450 మీటర్లు – రూ.241.50 లక్షలు, పశ్చిమ గోగులపల్లి పరిధిలో 8 పనులకు 5,450 మీటర్లు – రూ.108 లక్షలు నిధులు సమకూర్చనున్నారు.
ఈ రహదారుల నిర్మాణంతో 534 SC/ST/BC ఉప్పు రైతు కుటుంబాలకు ప్రత్యక్షంగా ప్రయోజనం కలగడంతో పాటు, పరిసర గ్రామాలకు చెందిన సుమారు 3,000 మంది ప్రజలకు ఉప్పు ఉత్పత్తి ప్రక్రియ ద్వారా పరోక్ష ఉపాధి ప్రయోజనం లభిస్తుందని పేర్కొన్నారు.
ఉప్పు రైతుల ఉత్పత్తికి మార్కెట్ ప్రాప్యత కల్పించడం, రవాణా సమస్యలను తొలగించడం, మధ్యవర్తులపై ఆధారపడటాన్ని తగ్గించడం, గిట్టుబాటు ధరకు ఉప్పును విక్రయించే అవకాశాలను పెంచడం, SC/ST/BC ఉప్పు రైతుల జీవనోపాధిని పరిరక్షించడం ఈ రహదారి నిర్మాణాల ప్రధాన లక్ష్యాలని శ్రీ బీద మస్తాన్ రావు యాదవ్ తెలిపారు.
ఈ చర్య ద్వారా గోగులపల్లి ప్రాంతంలోని సంప్రదాయ ఉప్పు ఉత్పత్తి రంగానికి మౌలిక సదుపాయాల బలోపేతం జరుగుతుందని, ఉప్పు రైతులు, కార్మికుల జీవనోపాధికి మరింత భరోసా లభిస్తుందని ఆయన పేర్కొన్నారు.
ఈ రహదారుల నిర్మాణానికి సహకరించిన గౌరవ ముఖ్యమంత్రివర్యులు శ్రీ నారా చంద్రబాబు నాయుడు గారికి మరియు వి బి జి రామ్ జి క్రింద నిధులు మంజూరు చేసిన గౌరవ డిప్యూటీ ముఖ్యమంత్రివర్యులు శ్రీ కె పవన్ కళ్యాణ్ గారికి శ్రీ బీద మస్తాన్ రావు యాదవ్ గారు ధన్యవాదాలు తెలిపారు.

కావలి తూర్పు గోగులపల్లిలో & పడమర గోగులపల్లిలో ఉప్పు రైతుల కోసం రూ.349.50 కోట్లతో మట్టి రహదారుల నిర్మాణం

Leave a comment

Your email address will not be published. Required fields are marked *