ఖమ్మం పోలీస్ కమిషనరేట్ పరిధిలోని సిటీ ఆర్ముడ్ రిజర్వ్ విభాగంలో హెడ్ కానిస్టేబుళ్లుగా విధులు నిర్వహిస్తూ ఏఆర్ఎస్సైగా ఉద్యోగోన్నతి పొందిన కె. ఆదినారాయణ, షేక్ ఖాసీం సాహెబ్, ఏ. రామస్వామిలను పోలీస్ కమిషనర్ సునీల్ దత్ అభినందించారు. ఉద్యోగోన్నతి సందర్భంగా వారికి శుభాకాంక్షలు తెలిపిన ఆయన, నూతన హోదాకు అనుగుణంగా మరింత బాధ్యతాయుతంగా విధులు నిర్వహించాలని సూచించారు. పోలీస్ శాఖలో ఉద్యోగోన్నతి కేవలం హోదా పెరగడమే కాకుండా బాధ్యతలను మరింత పెంచుతుందని పేర్కొన్నారు. క్రమశిక్షణ, అంకితభావంతో విధులు నిర్వర్తిస్తూ ప్రజలకు మెరుగైన పోలీస్ సేవలు అందించాలని సీపీ సూచించారు. ఉద్యోగోన్నతి పొందిన అధికారులు తమ విధుల్లో నిబద్ధతతో ముందుకు సాగాలని ఆకాంక్షించారు.
