చిరస్మరణీయుడు షేక్ పీర్ షా
కడప జిల్లాకు చెందిన స్వాతంత్ర్య సమరయోధుడు షేక్ పీర్ షా
కడప జిల్లాకు చెందిన స్వాతంత్ర్య సమరయోధుడు షేక్ పీర్ షా 1857 ప్రథమ స్వాతంత్ర్య సంగ్రామంలో బ్రిటిష్ పాలనకు వ్యతిరేకంగా పోరాడిన ధైర్యశాలి. పుట్టుకతోనే అంధుడైనప్పటికీ, స్వదేశంపై ఉన్న అపారమైన అభిమానం, పరాయి పాలనను అంతమొందించాలన్న దృఢ సంకల్పంతో బ్రిటిష్ పాలకులకు వ్యతిరేకంగా తిరుగుబాటుకు సిపాయిలను సమాయత్తం చేసిన యోధుడిగా చరిత్రలో నిలిచిపోయారు.
పూర్వపు వైఎస్సార్ కడప జిల్లా సిద్ధవటం తాలూకాలోని యల్లంపేట గ్రామానికి చెందిన షేక్ పీర్ షా, 1857లో సిపాయిల తిరుగుబాటు ప్రారంభమైన సమయంలో సుమారు 20 మైళ్ల దూరంలోని కడపకు చేరుకున్నారు. అక్కడ స్థానికులతో పాటు బ్రిటిష్ సైన్యంలో ఉన్న 30వ పటాలానికి చెందిన స్వదేశీ సిపాయిలతో సంబంధాలు ఏర్పరచుకున్నారు. బ్రిటిష్ సైనికాధికారుల విధానాలను వివరిస్తూ హిందూ, ముస్లిం సిపాయిలలో బ్రిటిష్ పాలనపై వ్యతిరేక భావాలను పెంపొందించారు.
బ్రిటిష్ పాలనకు మద్దతు ఇస్తున్న నైజాం నవాబు వైఖరిని కూడా షేక్ పీర్ షా తీవ్రంగా విమర్శించినట్లు చారిత్రక కథనాలు పేర్కొంటున్నాయి. స్వదేశీ పాలనను తిరిగి స్థాపించాలన్న లక్ష్యంతో హిందూ, ముస్లిం సైనికులను ఏకం చేసి తిరుగుబాటుకు సిద్ధం చేశారు.
1857 ఆగస్టు 28న మొహర్రం పర్వదినాన్ని తిరుగుబాటుకు ముహూర్తంగా నిర్ణయించినట్లు సమాచారం. 30వ సైనిక పటాలానికి చెందిన హవల్దార్ వరదరాజులు, లాన్స్ నాయక్ పరశురాం, సిపాయి వీరస్వామి, దలాయత్ యల్లప్ప, సుబేదార్ మేజర్ మహమ్మద్ అష్రఫ్, దలాయత్ సత్యజి, జమేదార్ జగ్గయ్య, హవల్దార్ మహమ్మద్ గౌస్, మౌల్వి అబ్దుల్ అజీజ్ హుస్సేన్ తదితరులను తిరుగుబాటుకు సిద్ధం చేసినట్లు చారిత్రక వివరాలు చెబుతున్నాయి.
అయితే తిరుగుబాటు పథకం అమలు కాకముందే బ్రిటిష్ గూఢచారులకు సమాచారం చేరింది. దీంతో అప్రమత్తమైన బ్రిటిష్ అధికారులు షేక్ పీర్ షాతో పాటు తిరుగుబాటుకు సిద్ధమైన సిపాయిలను అరెస్టు చేశారు. గ్రామీణ ప్రాంతానికి చెందిన, పుట్టుకతో అంధుడైన వ్యక్తి బ్రిటిష్ పాలనకు వ్యతిరేకంగా హిందూ, ముస్లిం సైనికులను ఏకం చేసి తిరుగుబాటుకు వ్యూహం రచించడం అప్పటి బ్రిటిష్ అధికారులను సైతం ఆశ్చర్యానికి గురిచేసింది.
బ్రిటిష్ ప్రభుత్వానికి వ్యతిరేకంగా తిరుగుబాటుకు కుట్ర పన్నారన్న ఆరోపణలపై షేక్ పీర్ షాపై విచారణ జరిపి 10 సంవత్సరాల కఠిన కారాగార శిక్ష విధించినట్లు చారిత్రక ఆధారాలు పేర్కొంటున్నాయి. అనంతరం కడప జైలు నుంచి తమిళనాడులోని మధురై లేదా తిరునెల్వేలి జైలుకు తరలించినట్లు సమాచారం.
అంగవైకల్యం తన సంకల్పానికి అడ్డుకాదని నిరూపిస్తూ, స్వదేశ స్వాతంత్ర్యం కోసం పోరాడిన షేక్ పీర్ షా త్యాగం నేటి తరానికి స్ఫూర్తిదాయకం. కడప గడ్డపై స్వాతంత్ర్య ఉద్యమానికి బీజాలు వేసిన యోధుల్లో ఆయనకు ప్రత్యేక స్థానం ఉందని చెప్పవచ్చు.
