ఆత్మకూరు డిపోను సందర్శించిన నెల్లూరు రీజినల్ చైర్మన్ సన్నపురెడ్డి సురేష్ రెడ్డి

ప్రయాణికులకు మెరుగైన సేవలే లక్ష్యం – త్వరలో ఎలక్ట్రిక్, సీఎన్‌జీ బస్సుల ప్రవేశం

ఆత్మకూరు (హరికిరణ్, పున్నమి ప్రతినిధి): నెల్లూరు ఆర్టీసీ రీజినల్ చైర్మన్ సన్నపురెడ్డి సురేష్ రెడ్డి ఆదివారం ఆత్మకూరు ఆర్టీసీ డిపోను సందర్శించి అధికారులు, ఉద్యోగులతో ప్రత్యేక సమావేశం నిర్వహించారు. డిపోలో ప్రస్తుతం ఉన్న పరిస్థితులు, ప్రయాణికులు ఎదుర్కొంటున్న సమస్యలు, భవిష్యత్తులో చేపట్టాల్సిన చర్యలపై సమీక్ష నిర్వహించారు.ఈ సందర్భంగా డిపో పరిధిలో నడుస్తున్న బస్సుల సమయాలు, ప్రయాణికుల రద్దీ, రూట్ల అవసరాలు, మౌలిక వసతుల అభివృద్ధి వంటి అంశాలపై అధికారులతో విస్తృతంగా చర్చించారు. ప్రజలకు మరింత మెరుగైన రవాణా సేవలు అందించేందుకు అవసరమైన మార్పులు చేపట్టాలని సూచించారు. ముఖ్యంగా ప్రయాణికుల అవసరాలను దృష్టిలో ఉంచుకుని బస్సుల వేళల్లో తగిన మార్పులు చేయాలని అధికారులకు ఆదేశించారు.ఆత్మకూరు మున్సిపల్ బస్టాండ్‌లో ప్రయాణికులకు అవసరమైన సౌకర్యాలు కల్పించేందుకు ప్రత్యేక చర్యలు తీసుకోవాలని సూచించారు. ప్రయాణికులు సౌకర్యవంతంగా ప్రయాణించేలా వేచిచోట్ల అభివృద్ధి, పరిశుభ్రత, తాగునీరు, ఇతర సదుపాయాలపై దృష్టి సారించాలని పేర్కొన్నారు.ఈ సందర్భంగా రీజినల్ చైర్మన్ సురేష్ రెడ్డి మాట్లాడుతూ, రాష్ట్ర ప్రభుత్వం అమలు చేస్తున్న శ్రీ శక్తి పథకం వల్ల మహిళా ప్రయాణికుల సంఖ్య గణనీయంగా పెరిగిందన్నారు. రాష్ట్రవ్యాప్తంగా ఆర్టీసీ బస్సుల్లో ప్రయాణికుల రద్దీ అధికమైందని, అందుకు అనుగుణంగా కొత్త బస్సుల అవసరం ఉందన్నారు. ప్రస్తుతం అందుబాటులో ఉన్న బస్సులతోనే ప్రజలకు ఎలాంటి ఇబ్బందులు కలగకుండా సేవలు అందించేందుకు అధికారులు, సిబ్బంది కృషి చేస్తున్నారని తెలిపారు.కాలుష్య నిర్మూలన, ఇంధన వ్యయాల తగ్గింపు లక్ష్యంగా రాష్ట్ర ప్రభుత్వం త్వరలో భారీ స్థాయిలో ఎలక్ట్రిక్ మరియు సీఎన్‌జీ బస్సులను ప్రవేశపెట్టనున్నట్లు వెల్లడించారు. రాష్ట్రవ్యాప్తంగా 4,000కు పైగా ఎలక్ట్రిక్, సీఎన్‌జీ బస్సులను నడిపేందుకు ప్రతిపాదనలు సిద్ధం చేసినట్లు చెప్పారు. త్వరలోనే ఈ బస్సులను వివిధ డిపోలకు కేటాయించనున్నట్లు తెలిపారు.అంతేకాకుండా కొత్త బస్సుల నిర్వహణ కోసం అవసరమైన ఛార్జింగ్ స్టేషన్లు, సర్వీస్ పాయింట్లు, సాంకేతిక మౌలిక వసతులను కూడా ఏర్పాటు చేయనున్నట్లు వివరించారు. పర్యావరణహిత రవాణా వ్యవస్థను అభివృద్ధి చేయడం ద్వారా ప్రజలకు మెరుగైన సేవలు అందించడమే ప్రభుత్వ లక్ష్యమని పేర్కొన్నారు.ఈ సమావేశంలో డిపో మేనేజర్ శివకేశ్ యాదవ్, అసిస్టెంట్ మేనేజర్ రాజ్‌కుమార్, ఆర్టీసీ ఉద్యోగులు సుధీర్, పద్మారావు, వెంకటేశ్వర్లు, ప్రతాప్ రెడ్డి, రాఘవ తదితరులు పాల్గొన్నారు. డిపో అభివృద్ధి, ప్రయాణికుల సంక్షేమం కోసం అందరూ సమన్వయంతో పనిచేయాలని రీజినల్ చైర్మన్ పిలుపునిచ్చారు.