శ్రీ ధర్మరాజు స్వామి బ్రహ్మోత్సవాల్లో ధ్వజారోహణం-పట్టువస్త్రాలు సమర్పించిన ఎమ్మెల్యే సుధీర్ రెడ్డి

శ్రీ కాళహస్తి, జులై 17, (పున్నమి టెంపుల్ న్యూస్): శ్రీకాళహస్తీశ్వర స్వామి వారి దేవస్థాన అనుబంధ ఆలయమైన శ్రీ ద్రౌపదీ సమేత శ్రీ ధర్మరాజు స్వామి వారి వార్షిక బ్రహ్మోత్సవాలు శుక్రవారం నాడు అత్యంత వైభవంగా, శాస్త్రోక్తంగా ప్రారంభమయ్యాయి. ఉత్సవాల తొలిరోజున ఆలయ వేద పండితులు, అర్చకులు మంగళవాయిద్యాలు మరియు వేదమంత్రాల ఘోష నడుమ భక్తిశ్రద్ధలతో ధ్వజారోహణ కార్యక్రమాన్ని అట్టహాసంగా నిర్వహించారు. ఈ విశేష మహోత్సవానికి శ్రీకాళహస్తి నియోజకవర్గ శాసనసభ్యులు (ఎమ్మెల్యే) బొజ్జల వెంకట సుధీర్ రెడ్డి ముఖ్య అతిథిగా విచ్చేసి స్వామి, అమ్మవార్లను దర్శించుకున్నారు. అనంతరం కూటమి నేత, బీజేపీ రాష్ట్ర నాయకులు కోలా ఆనంద్, ఆలయ పాలకమండలి అధ్యక్షులు కొట్టే సాయి ప్రసాద్, శ్రీకాళహస్తీశ్వర స్వామి దేవస్థాన కార్యనిర్వహణాధికారి (ఈ.ఓ) వెంకటేశ్వర్లుతో కలిసి ప్రభుత్వం తరఫున స్వామి అమ్మవార్లకు పట్టువస్త్రాలను అత్యంత భక్తిప్రపత్తులతో సమర్పించారు. ఆధ్యాత్మిక వాతావరణంలో జరిగిన ఈ పవిత్ర కార్యక్రమంలో ఆలయ పాలకమండలి సభ్యులు, తెలుగుదేశం పార్టీ నాయకులు విజయ్ కుమార్, మాసారపు సుబ్బయ్య, కూటమి పార్టీల ముఖ్య నాయకులు, దేవస్థాన అధికారులు, సిబ్బందితో పాటు భారీ సంఖ్యలో భక్తులు పాల్గొని స్వామివారి కృపకు పాత్రులయ్యారు.