బొజ్జల కుటుంబం సమక్షంలో శ్రీకాళహస్తిలో దివ్యాంగశక్తి పథకం ప్రారంభం

శ్రీకాళహస్తి, మార్చి 18 (పున్నమి న్యూస్): శ్రీకాళహస్తి ఆర్టీసీ బస్టాండ్ ప్రాంగణంలో ఆంధ్రప్రదేశ్ ప్రభుత్వం ప్రవేశపెట్టిన దివ్యాంగశక్తి పథకాన్ని బుధవారం నాడు ఘనంగా ప్రారంభించారు. ఈ కార్యక్రమంలో శ్రీకాళహస్తి ఆర్డీవో భాను ప్రకాష్ రెడ్డి, స్థానిక ఎమ్మెల్యే బొజ్జల సుధీర్ రెడ్డి తల్లి బొజ్జల బృందమ్మ సంయుక్తంగా పథకాన్ని ప్రారంభించారు. ఈ సందర్భంగా ఆర్డీవో భాను ప్రకాష్ రెడ్డి మాట్లాడుతూ….ప్రత్యేక ప్రతిభావంతుల ప్రయాణ సౌకర్యాల మెరుగుదలకు ఈ పథకం దోహదపడుతుందని శ్రీకాళహస్తి ఆర్టీసీ పరిధిలో 98 బస్సులు దివ్యాంగులకు అనుకూలంగా అందుబాటులో ఉంచినట్లు చెప్పారు. ఇప్పటికే పీహెచ్సీ పాస్‌లు కలిగిన 359 మంది లబ్ధిదారులు ఉండగా పట్టణ పరిధిలో మొత్తం 1972 మంది ప్రత్యేక ప్రతిభావంతులు ఉన్నారని వివరించారు. ఈ పథకం కింద మహిళాశక్తి బస్సుల్లో దివ్యాంగులకు పూర్తిగా ఉచిత ప్రయాణం కల్పించబడుతుందని, డీలక్స్, లగ్జరీ బస్సుల్లో 50 శాతం రాయితీ ఇవ్వబడుతుందని అర్హులైన దివ్యాంగులు ఈ పథకాన్ని సద్వినియోగం చేసుకోవాలని ఆర్డీవో సూచించారు. ఈ కార్యక్రమంలో బీజేపీ రాష్ట్ర ఉపాధ్యక్షుడు కోలా ఆనంద్, టీడీపీ పట్టణ అధ్యక్షుడు విజయ్ కుమార్, దేవస్థానం చైర్మన్ కొట్టే సాయి ప్రసాద్, మున్సిపల్ కమిషనర్ భవాని ప్రసాద్, ఆర్టీసీ అధికారులు, కూటమి నాయకులు, దివ్యాంగులు పాల్గొన్నారు.