చిట్వేల్‌లో విద్యా విప్లవం ఆరంభం – ఒకేసారి 33 మంది ఉపాధ్యాయుల జాయినింగ్‌

చిట్వేల్ మండలం విద్యా రంగంలో చరిత్ర సృష్టించింది. మెగా డీఎస్సీ 2025 నియామక ప్రక్రియలో భాగంగా మొత్తం 33 మంది ఉపాధ్యాయులు — 25 మంది ఎస్జీటీలు, ఒక ఉర్దూ టీచర్‌, 7 మంది పిఎస్ హెచ్ఎంలు — ఈరోజు తమ తమ పాఠశాలల్లో విధుల్లో చేరారు. మండల విద్యాశాఖ అధికారి ఈశ్వరయ్య గారు జాయినింగ్ రిపోర్టులను స్వీకరించి, ఉపాధ్యాయులతో ప్రత్యేక సమావేశం నిర్వహించారు. “ప్రభుత్వం ప్రతిష్టాత్మకంగా నిర్వహించిన ఈ మెగా డీఎస్సీ ద్వారా మీరందరూ ఎంపికయ్యారు. ఇప్పుడు మీ కర్తవ్యమే విద్యార్థుల జీవితాలను మార్చడం. క్రమశిక్షణ, విలువలు, సమయపాలనతో బోధించి పాఠశాలలను అభివృద్ధి దిశగా నడిపించండి” అని సూచించారు. సీనియర్ ఉపాధ్యాయులు కామటం వెంకటేశ్వర్లు, కాలేషా, నారాయణ రెడ్డి తదితరులు మాట్లాడుతూ — “ఉపాధ్యాయ వృత్తి పవిత్రమైనది, సేవాభావంతో పనిచేయండి” అని అన్నారు. కార్యక్రమంలో సిఆర్ఎంటి లు చంద్రశేఖర్‌, విజయలక్ష్మి, కంప్యూటర్ ఆపరేటర్‌ గంగాదేవి, ఇతర ఉపాధ్యాయులు పాల్గొన్నారు.