డా. బి.ఆర్. అంబేద్కర్ కోనసీమ జిల్లా, మామిడికుదురు మండలం, మొగలికుదురు గ్రామంలో 150 సంవత్సరాల చరిత్ర కలిగిన భారీ రావి చెట్టును నరికివేయకుండా, శాస్త్రీయ పద్ధతుల్లో రీప్లాంటేషన్/చెట్టు మార్పిడి ద్వారా సంరక్షించే ప్రక్రియకు పి.గన్నవరం నియోజకవర్గ శాసనసభ్యులు గిడ్డి సత్యనారాయణ ప్రాధాన్యత ఇచ్చారు.
150 ఏళ్ల చరిత్ర కలిగిన ఈ రావి చెట్టు స్థానిక పర్యావరణానికి, జీవవైవిధ్యానికి ఎంతో విలువైనదని ఎమ్మెల్యే గారు పేర్కొన్నారు. ఇలాంటి పురాతన వృక్షాలను సంరక్షించడం ద్వారా వందల ఏళ్ల ప్రకృతి వారసత్వాన్ని భవిష్యత్ తరాలకు అందించవచ్చన్నారు.
పెద్ద చెట్టు నీడను తక్షణమే అందించడంతో పాటు పక్షులు, చిన్న జీవులకు ఆవాసం కల్పించడం, కార్బన్ నిల్వ చేయడం, గాలి నాణ్యతను మెరుగుపరచడం, స్థానిక ఉష్ణోగ్రతలను నియంత్రించడం, నేల సంరక్షణకు తోడ్పడటం వంటి అనేక పర్యావరణ ప్రయోజనాలు ఈ వృక్షం ద్వారా కొనసాగుతాయని తెలిపారు.
అయితే 150 ఏళ్ల వయస్సున్న భారీ రావి చెట్టును రీప్లాంట్ చేయడం అత్యంత క్లిష్టమైన ప్రక్రియ అని, చెట్టు వేర్ల వ్యవస్థ, బరువు, తరలింపు దూరం, కొత్త ప్రదేశంలోని నేల–నీటి పరిస్థితులను శాస్త్రీయంగా పరిశీలించి, వృక్ష నిపుణుల పర్యవేక్షణలో ఈ ప్రక్రియను చేపట్టాల్సిన అవసరం ఉందని పేర్కొన్నారు.
“చారిత్రక వృక్షాలను నరికివేయడం కాదు… వాటికి మరో జీవితం కల్పించడమే మన లక్ష్యం. పర్యావరణ పరిరక్షణకు ప్రతి ఒక్కరూ బాధ్యతగా ముందుకు రావాలి” అని ఎమ్మెల్యే గిడ్డి సత్యనారాయణ పిలుపునిచ్చారు.ఈ కార్యక్రమంలో కూటమి నాయకులు, ప్రజాప్రతినిధులు, కార్యకర్తలు తదితరులు పాల్గొన్నారు
