యువతకు ఉద్యోగ అవకాశాలు కల్పించాలి – నిరుద్యోగ భృతి వెంటనే ఇవ్వాలి
డీవైఎఫ్ఐ యాచారం మండల నూతన కమిటీ ఎన్నిక
అధ్యక్షుడిగా కొండ్రు భాస్కర్, కార్యదర్శిగా ఆల్లంపల్లి జంగయ్య ఎంపిక
పున్నమి న్యూస్
యాచారం, జూన్ 14 (పున్నమి న్యూస్): యువతకు ఉపాధి అవకాశాలు విస్తృతంగా కల్పించాలని, రాష్ట్రంలోని నిరుద్యోగ యువతకు ప్రభుత్వం వెంటనే నిరుద్యోగ భృతి అందించాలని డీవైఎఫ్ఐ నూతన మండల కమిటీ నాయకులు డిమాండ్ చేశారు. యువత సమాజ అభివృద్ధి, దేశ ప్రగతి కోసం ముందుండి పనిచేయాలని, డ్రగ్స్, గంజాయి, మద్యం వంటి సామాజిక దురాచారాలకు దూరంగా ఉండి సోదరభావంతో ముందుకు సాగాలని పిలుపునిచ్చారు.
భారత ప్రజాతంత్ర యువజన సమాఖ్య (డీవైఎఫ్ఐ) యాచారం మండల మహాసభలు మండల పరిధిలోని చింతపట్ల గ్రామంలోని బండికంటి శేఖర్నగర్లో ఘనంగా నిర్వహించబడ్డాయి. ఈ సందర్భంగా నూతన మండల కమిటీని ఏకగ్రీవంగా ఎన్నుకున్నారు.
మండల అధ్యక్షుడిగా కొండ్రు భాస్కర్, ప్రధాన కార్యదర్శిగా ఆల్లంపల్లి జంగయ్య ఎన్నిక కాగా, ఉపాధ్యక్షులుగా రమేష్, గణేష్, శ్రీకాంత్, సహాయ కార్యదర్శులుగా ఉపేందర్, సైదులు ఎన్నికయ్యారు. కమిటీ సభ్యులుగా జంగయ్య, రాజు, భూషణ్, అనిల్, అబ్బాస్ తదితరులను ఎన్నుకున్నారు.
ఈ సందర్భంగా నూతనంగా ఎన్నికైన నాయకులు మాట్లాడుతూ యువత ఎదుర్కొంటున్న నిరుద్యోగ సమస్య దేశంలో ప్రధాన సమస్యగా మారిందన్నారు. ప్రభుత్వాలు యువతకు ఉద్యోగ అవకాశాలు కల్పించడంతో పాటు నైపుణ్యాభివృద్ధి కార్యక్రమాలను విస్తరించాలని కోరారు. గ్రామీణ యువతకు విద్య, ఉపాధి, క్రీడలు, సామాజిక చైతన్యం వంటి అంశాలపై ప్రత్యేక దృష్టి సారించాలని ప్రభుత్వానికి విజ్ఞప్తి చేశారు.
యువతలో పెరుగుతున్న మాదకద్రవ్యాల వినియోగాన్ని అరికట్టేందుకు కఠిన చర్యలు తీసుకోవాలని, యువజన సంఘాలు సామాజిక బాధ్యతతో పనిచేయాలని సూచించారు. డీవైఎఫ్ఐ యువత హక్కుల కోసం నిరంతరం పోరాడుతుందని, ప్రజా సమస్యల పరిష్కారానికి ఉద్యమాలను మరింత బలోపేతం చేస్తుందని తెలిపారు.
ఈ మహాసభలో డీవైఎఫ్ఐ మాజీ జిల్లా ఉపాధ్యక్షులు చందు నాయక్, గిరికాంత్, కాటంరాజు, శేఖర్, కృష్ణ, రాజు తదితర నాయకులు పాల్గొని నూతన కమిటీకి శుభాకాంక్షలు తెలిపారు.
– పున్నమి న్యూస్ ప్రతినిధి, యాచారం
