ఇబ్రహీంపట్నం మున్సిపల్ సర్వసభ్య సమావేశంలో ఉద్రిక్తత
వార్డు అభివృద్ధి ప్రతిపాదనలు తొలగించారంటూ నేలపై కూర్చొని కౌన్సిలర్ భానుప్రియ నిరసన
‘న్యాయం చేయకపోతే నిరాహార దీక్ష చేస్తా’ అంటూ హెచ్చరిక
ఇబ్రహీంపట్నం, జనం న్యూస్:
ఇబ్రహీంపట్నం మున్సిపాలిటీ సర్వసభ్య సమావేశం శనివారం ఉద్రిక్త వాతావరణంలో సాగింది. 18వ వార్డు కౌన్సిలర్ సిద్ధం భానుప్రియ తమ వార్డుకు సంబంధించిన అభివృద్ధి ప్రతిపాదనలను అధికారులు, పాలకవర్గం సమావేశ అజెండా నుంచి తొలగించారని ఆరోపిస్తూ సమావేశ మందిరంలోనే నేలపై కూర్చొని నిరసన వ్యక్తం చేశారు. దీంతో సమావేశంలో కొంతసేపు ఉద్రిక్త పరిస్థితులు నెలకొన్నాయి.
కౌన్సిలర్ భానుప్రియ మాట్లాడుతూ, ప్రజలు ఎన్నుకొని పంపిన ప్రజాప్రతినిధిగా తమ వార్డు సమస్యలను పరిష్కరించేందుకు పలు అభివృద్ధి పనులను సమావేశంలో చర్చించేందుకు ప్రతిపాదనలు పంపినట్లు తెలిపారు. అయితే ఎలాంటి సమాచారం ఇవ్వకుండా తమ ప్రతిపాదనలను జాబితా నుంచి తొలగించడం ప్రజాస్వామ్య స్ఫూర్తికి విరుద్ధమని మండిపడ్డారు.
ప్రత్యేకంగా తమ వార్డులో కుమ్మరి సంఘం భవన నిర్మాణానికి సంబంధించిన ప్రతిపాదనను సమావేశంలో చర్చించాలని కోరినప్పటికీ దానిని అజెండాలో చేర్చలేదని ఆమె ఆరోపించారు. ఎన్నో సంవత్సరాలుగా భవనం కోసం ఎదురుచూస్తున్న కుమ్మరి సంఘం సభ్యుల ఆకాంక్షలను పాలకవర్గం పట్టించుకోకపోవడం బాధాకరమన్నారు.
సమావేశంలో తనకు మాట్లాడే అవకాశం కూడా ఇవ్వలేదని, ప్రజల సమస్యలను ప్రస్తావించకుండా అడ్డుకోవడం సరైంది కాదని భానుప్రియ ఆవేదన వ్యక్తం చేశారు. వార్డు ప్రజల తరఫున తాను పోరాటం కొనసాగిస్తానని, అభివృద్ధి పనులకు వెంటనే ఆమోదం తెలపాలని డిమాండ్ చేశారు.
తమ వార్డు అభివృద్ధి ప్రతిపాదనలను తిరిగి అజెండాలో చేర్చి ఆమోదించకపోతే మున్సిపల్ కార్యాలయం ఎదుట నిరాహార దీక్ష చేపడతానని ఆమె హెచ్చరించారు. ప్రజలకు న్యాయం జరిగే వరకు వెనక్కి తగ్గేది లేదని స్పష్టం చేశారు.
కౌన్సిలర్ నిరసనతో సమావేశంలో కొంతసేపు చర్చలు నిలిచిపోయాయి. అనంతరం ఇతర సభ్యులు, అధికారులు ఆమెతో మాట్లాడి పరిస్థితిని సర్దిచెప్పేందుకు ప్రయత్నించినట్లు సమాచారం. అయితే ఈ ఘటన మున్సిపాలిటీలో రాజకీయ చర్చకు దారితీసింది. వార్డు అభివృద్ధి అంశాలపై పారదర్శకంగా వ్యవహరించాలని, ప్రజాప్రతినిధుల ప్రతిపాదనలకు తగిన ప్రాధాన్యం ఇవ్వాలని పలువురు సభ్యులు అభిప్రాయపడినట్లు తెలిసింది.
