యముడి వేషధారణలో రోడ్డు భద్రతపై అవగాహన

ముద్దనూరులో వాహనదారులకు వినూత్న రీతిలో ట్రాఫిక్‌ నిబంధనలపై సందేశం ముద్దనూరు: రోడ్డు భద్రతపై వాహనదారుల్లో అవగాహన కల్పించేందుకు ముద్దనూరు పోలీసులు వినూత్న కార్యక్రమం చేపట్టారు. పట్టణంలోని ప్రధాన రహదారిపై రిటైర్డ్‌ లెక్చరర్‌ పుల్లారెడ్డి యముడి వేషధారణలో వాహనదారులకు అవగాహన కల్పించారు. ఈ సందర్భంగా ద్విచక్ర వాహనదారులు తప్పనిసరిగా హెల్మెట్‌ ధరించాలని, కార్లలో ప్రయాణించే వారు సీటుబెల్ట్‌ ధరించాలని సూచించారు. మద్యం సేవించి వాహనాలు నడపడం, అతివేగం, నిర్లక్ష్యంగా డ్రైవింగ్‌ చేయడం వల్ల ప్రమాదాలు జరిగే అవకాశం ఉందని హెచ్చరించారు. యముడి వేషధారణలో వాహనదారులను ఆపి రోడ్డు భద్రతపై అవగాహన కల్పించడం స్థానికులను, వాహనదారులను ఆకట్టుకుంది. సాధారణ హెచ్చరికలకు భిన్నంగా వినూత్న రీతిలో సందేశాన్ని అందించడం ద్వారా రోడ్డు ప్రమాదాల నివారణపై ప్రజల్లో చైతన్యం తీసుకురావడమే కార్యక్రమం ఉద్దేశమని నిర్వాహకులు తెలిపారు. ప్రతి ఒక్కరూ ట్రాఫిక్‌ నిబంధనలు పాటిస్తూ బాధ్యతాయుతంగా వాహనాలు నడపాలని, తమ ప్రాణాలతో పాటు ఇతరుల ప్రాణాలను కూడా కాపాడాలని సూచించారు. రోడ్డు భద్రత విషయంలో నిర్లక్ష్యం చేయకుండా అప్రమత్తంగా ఉండాలని కోరారు.