తల్లికి వందనం పథకానికి రూ. 10,120 కోట్లు-టీడీపీ రాష్ట్ర కార్యదర్శి సుబ్బయ్య

శ్రీ కాళహస్తి, జులై 16, (పున్నమి న్యూస్): ఆంధ్రప్రదేశ్ రాష్ట్రంలో విద్యా రంగాన్ని బలోపేతం చేస్తూ ముఖ్యమంత్రి నారా చంద్రబాబు నాయుడు నేతృత్వంలోని కూటమి ప్రభుత్వం అత్యంత ప్రతిష్టాత్మకమైన ‘తల్లికి వందనం’ పథకం (2026-27) అమలుకు రూ. 10,120.78 కోట్ల భారీ బడ్జెట్తో పరిపాలనా అనుమతులు మంజూరు చేయడం హర్షణీయమని తెలుగుదేశం పార్టీ రాష్ట్ర కార్యదర్శి మాసారపు సుబ్బయ్య అన్నారు. ఈ పథకం ద్వారా రాష్ట్రవ్యాప్తంగా 1 నుండి 12వ తరగతి వరకు చదువుతున్న 67,47,190 మంది విద్యార్థులకు, అలాగే 42,70,802 మంది అర్హులైన తల్లులకు ఎంతో లబ్ధి చేకూరనుందని ఆయన వెల్లడించారు. పిల్లల సంఖ్యతో సంబంధం లేకుండా ప్రతి విద్యార్థికి ఏడాదికి ₹15,000 చొప్పున ఆర్థిక సాయం అందుతుందని, ఇందులో పాఠశాలల నిర్వహణ, పరిశుభ్రత కోసం ₹2,000 మినహాయించి, మిగిలిన మొత్తాన్ని నేరుగా తల్లుల ఖాతాల్లో జమ చేస్తారని పేర్కొన్నారు. జులై 22న మొదటి విడత నగదు పంపిణీ జరగనుండగా, ఆగస్టు 30 కల్లా మిగిలిన ప్రక్రియ అంతా పారదర్శకంగా పూర్తి చేయనున్నట్లు సుబ్బయ్య వివరించారు