కారు ఢీకొని అక్కడికక్కడే మృతి.. దూడ రోదన చూసి చలించిన స్థానికులు
విశాఖపట్నం జిల్లా,మారికవలస (పున్నమి ప్రతినిధి) సెప్టెంబర్ 22 ::
మారికవలస రోడ్డులో మెట్రో సమీపంలో హృదయవిదారక ఘటన చోటుచేసుకుంది. రోడ్డుపై ఉన్న సాధు జంతువైన ఆవును కారు ఢీకొనడంతో ఆవు అక్కడికక్కడే మృతి చెందింది.
తల్లి ఆవు మృతదేహం వద్దకు చేరుకున్న దూడ.. తల్లి లేచి వస్తుందేమో అన్నట్లుగా చుట్టూ తిరుగుతూ కనిపించిన దృశ్యం అక్కడున్న వారిని తీవ్రంగా కలచివేసింది. మాటలు రాని మూగజీవి కన్నీటి బాధను చూసి పలువురు స్థానికులు భావోద్వేగానికి గురయ్యారు.
తల్లి లేని దూడను చూసిన క్షణం.. అక్కడి వాతావరణం ఒక్కసారిగా విషాదంగా మారింది. మూగజీవుల పట్ల మానవత్వం, రహదారిపై వాహనదారుల అప్రమత్తత ఎంత అవసరమో ఈ ఘటన మరోసారి గుర్తుచేసింది.
