సత్తుపల్లి / ఖమ్మం
సత్తుపల్లి నుంచి ఖమ్మం ప్రయాణించే ప్రయాణికుల సౌకర్యార్థం డీలక్స్ బస్సుల్లో ఎక్స్ప్రెస్ ఛార్జీతో ప్రయాణించే అవకాశం కల్పించినట్లు సత్తుపల్లి డిపో మేనేజర్ గురిజాల లక్ష్మీనారాయణ తెలిపారు. బుధవారం నుంచి ఈ విధానం అమల్లోకి వస్తుందని పేర్కొన్నారు. సత్తుపల్లి–ఖమ్మం రూట్లో ప్రతి ఎనిమిది నిమిషాలకు ఒక బస్సు నడిచేలా ప్రణాళిక రూపొందించామని, మొత్తం 99 ట్రిప్పులు నడుస్తున్నాయని తెలిపారు. ఇప్పటివరకు డీలక్స్ ఛార్జీ రూ.130 ఉండగా, ఇకపై రూ.120గా నిర్ణయించినట్లు వివరించారు. ఈ రూట్లో 10 డీలక్స్ బస్సులు నడుస్తున్నాయని చెప్పారు. సత్తుపల్లి–విజయవాడకు ప్రతి 20 నిమిషాలకు సర్వీస్ ఏర్పాటు చేశామన్నారు. అశ్వారావుపేటకు అదనంగా ఆరు ట్రిప్పులు, ఏలూరుకు రెండు సర్వీసులు ఏర్పాటు చేసినట్లు తెలిపారు. సత్తుపల్లి–అంకంపాలెం రూట్లో సాయంత్రం 6 గంటలకు అదనపు ట్రిప్పు, భద్రాచలానికి నూతన పల్లెవెలుగు సర్వీస్, కొత్తగూడెంకు నూతన సర్వీస్ ప్రారంభించినట్లు చెప్పారు. కార్యక్రమంలో అసిస్టెంట్ మేనేజర్ జి. రజిత పాల్గొన్నారు.
