పౌర్ణమి వేళ శ్రీకాళహస్తీశ్వరునికి వైభవంగా ఊంజల సేవ

శ్రీ కాళహస్తి, జూన్ 29, (పున్నమి న్యూస్) : శ్రీకాళహస్తి క్షేత్రంలోని శ్రీ జ్ఞానప్రసూనాంబ సమేత శ్రీకాళహస్తీశ్వర స్వామి వారి దేవస్థానంలో పౌర్ణమి సందర్భంగా సోమవారం రాత్రి స్వామి, అమ్మవార్ల ఊంజల సేవ అత్యంత వైభవంగా నిర్వహించారు. ఆలయ సంప్రదాయాలకు అనుగుణంగా ఉత్సవమూర్తులను సర్వాంగ సుందరంగా అలంకరించిన అర్చకులు ప్రత్యేక పూజలు, అర్చనలు నిర్వహించిన అనంతరం శాస్త్రోక్తంగా ఊంజల సేవను జరిపారు. మంగళవాయిద్యాలు, వేదమంత్రోచ్ఛారణల మధ్య భక్తిమయ వాతావరణంలో జరిగిన ఈ సేవ భక్తులను విశేషంగా ఆకట్టుకుంది. ఈ పవిత్ర వేడుకను తిలకించేందుకు రాష్ట్రంలోని పలు ప్రాంతాలతో పాటు దేశం నలుమూలల నుంచి భక్తులు భారీ సంఖ్యలో తరలివచ్చి స్వామి, అమ్మవార్లను దర్శించుకుని ఆశీర్వాదాలు పొందారు. కార్యక్రమంలో ఆలయ కార్యనిర్వహణాధికారి (ఈవో) బీకే వెంకటేశ్వర్లు, ధర్మకర్తల మండలి అధ్యక్షులు కొట్టే సాయి ప్రసాద్, బోర్డు సభ్యులు కోలా విశాలాక్షి, కురప శెట్టి, ఆలయ అర్చకులు, వేద పండితులు, సిబ్బంది పాల్గొన్నారు. భక్తులకు ఎలాంటి అసౌకర్యం కలగకుండా దర్శనం, సేవల నిర్వహణకు అవసరమైన అన్ని ఏర్పాట్లను ఆలయ అధికారులు సమర్థవంతంగా పర్యవేక్షించారు.