నాన్న ఇచ్చిన స్ఫూర్తి నా బలం – ఎంపీపీ శ్రీమతి మజ్జి శారద ప్రియాంక

ఐదేళ్ల ప్రయాణాన్ని గుర్తు చేసుకుంటూ భావోద్వేగానికి గురైన ఎంపీపీ శారదా ప్రియాంక విశాఖపట్నం జిల్లా,ఆనందపురం, (పున్నమి ప్రతినిధి) సెప్టెంబర్ 17:: ఆనందపురం మండల పరిషత్ కార్యాలయం గురువారం భావోద్వేగ క్షణాలకు వేదికగా మారింది. ఐదేళ్లపాటు మండల పరిషత్ అధ్యక్షురాలిగా తన బాధ్యతలను నిర్వర్తించిన ఎంపీపీ డా. మజ్జి శారదా ప్రియాంకకు ప్రజాప్రతినిధులు, సర్పంచ్‌లు, ఎంపీటీసీలు ఘనంగా సన్మానం చేసి ఆత్మీయ వీడ్కోలు పలికారు. ఈ సందర్భంగా తన ఐదేళ్ల ప్రయాణాన్ని గుర్తు చేసుకున్న ఎంపీపీ ప్రియాంక భావోద్వేగానికి గురయ్యారు. “నాన్న ఇచ్చిన స్ఫూర్తి నా బలం.. ఆయన అందించిన తోడ్పాటు, ప్రోత్సాహం, నాపై ఉంచిన నమ్మకమే నన్ను ఈ స్థాయికి తీసుకొచ్చాయి” అంటూ ఆమె తన తండ్రి మజ్జి వెంకట్రావును గుర్తుచేసుకున్నారు. ❤️ నాన్న స్ఫూర్తితోనే ప్రజాసేవలో అడుగులు.. తన తండ్రి మజ్జి వెంకట్రావు, చిన్నాన్నలు స్వర్గీయ మజ్జి అప్పారావు, మజ్జి సత్యనారాయణ అందించిన స్ఫూర్తి తన జీవితంలో ఎప్పటికీ మరువలేనిదని ప్రియాంక పేర్కొన్నారు. ప్రతి అడుగులోనూ కుటుంబ సభ్యులు అందించిన ప్రోత్సాహం తనకు కొండంత అండగా నిలిచిందన్నారు. 🤝 ఐదేళ్ల ప్రయాణంలో అందరి సహకారం.. ఎంపీపీగా బాధ్యతలు చేపట్టిన నాటి నుంచి మండల అభివృద్ధి కోసం తన వంతు కృషి చేశానని ప్రియాంక తెలిపారు. సర్పంచ్‌లు, ఎంపీటీసీలు, అధికారులు, సిబ్బంది, నాయకులు, కార్యకర్తలు, ప్రజలు అందించిన సహకారం వల్లే ఎన్నో అభివృద్ధి కార్యక్రమాలు ముందుకు తీసుకెళ్లగలిగానన్నారు. “ఈ ఐదేళ్లలో నేను ఒంటరిగా ఏమీ చేయలేదు.. నా వెంట నడిచిన ప్రతి ఒక్కరి సహకారంతోనే ఈ ప్రయాణం సాగింది” అంటూ ఆమె కృతజ్ఞతలు తెలిపారు. 💐 ప్రియాంక సేవలను కొనియాడిన ప్రజాప్రతినిధులు సన్మాన కార్యక్రమంలో పాల్గొన్న సర్పంచ్‌లు, ఎంపీటీసీలు మాట్లాడుతూ.. ఎంపీపీ ప్రియాంక నాయకత్వంలో మండల పరిషత్ అభివృద్ధి కార్యక్రమాలు కొనసాగాయని పేర్కొన్నారు. అందరినీ కలుపుకుని ముందుకు వెళ్లే విధానం ఆమె ప్రత్యేకతగా అభివర్ణించారు. 🥹 వీడ్కోలు వేళ.. కన్నీటి పర్యంతమైన క్షణాలు అనంతరం సర్పంచ్‌లు, ఎంపీటీసీలను ఎంపీపీ ప్రియాంక దుశ్శాలువాలతో సత్కరించి జ్ఞాపికలు అందజేశారు. ప్రజాప్రతినిధులు సైతం ఎంపీపీ ప్రియాంకను పూలమాలలు, దుశ్శాలువాలతో ఘనంగా సన్మానించి జ్ఞాపికను అందించారు. ఐదేళ్ల అనుబంధాన్ని గుర్తుచేసుకుంటూ పలువురు ప్రజాప్రతినిధులు భావోద్వేగానికి గురయ్యారు. మేళతాళాల నడుమ సాగిన వీడ్కోలు కార్యక్రమం ఆనందపురం మండల పరిషత్‌లో ఒక మధురమైన జ్ఞాపకంగా నిలిచింది.