నందలూరులో శిలాఫలకాల వివాదం.. కూల్చివేతపై పల్లె గ్రీష్మంత్ రెడ్డి ఆరోపణలు
నందలూరు: నందలూరు మండలం నాగిరెడ్డిపల్లి మేజర్ గ్రామపంచాయతీ పరిధిలో శిలాఫలకాల ఏర్పాటుపై రాజకీయ వివాదం నెలకొంది. అరవపల్లి రైల్వే గేట్ నుంచి ఆర్‌అండ్‌బీ బంగ్లా వద్ద ఉన్న శాఖా గ్రంథాలయం వరకు డ్రెయిన్ నిర్మాణానికి సంబంధించి ఏర్పాటు చేసిన శిలాఫలకాన్ని కొందరు కూటమి నాయకులు కూల్చివేశారని వైఎస్సార్‌సీపీ నేత పల్లె గ్రీష్మంత్ రెడ్డి ఆరోపించారు. రాజ్యసభ సభ్యుల నిధులతో చేపట్టనున్న అభివృద్ధి పనులకు సంబంధించి శిలాఫలకం ఏర్పాటు చేసినట్లు ఆయన తెలిపారు. శిలాఫలకం కూల్చివేత ఘటనపై రాజ్యసభ సభ్యులు, కడప ఎస్పీ దృష్టికి తీసుకెళ్లి, బాధ్యులపై చట్టపరమైన చర్యలు తీసుకునేలా చూస్తామని పేర్కొన్నారు. అదేవిధంగా అరవపల్లె ప్లేగ్రౌండ్ సమీపంలోని శ్రీరాముని ఆలయం వద్ద వాటర్‌షెడ్ నిర్మాణానికి రూ.4.20 లక్షలు, సిమెంట్ రోడ్డు నిర్మాణానికి రూ.1.80 లక్షలతో పనులకు సంబంధించిన మరో శిలాఫలకాన్ని ఏర్పాటు చేసినట్లు గ్రీష్మంత్ రెడ్డి తెలిపారు. ఈ శిలాఫలకాన్ని కూడా కూల్చేందుకు కొందరు కూటమి నాయకులు వచ్చిన సమయంలో తాను అడ్డుకున్నట్లు చెప్పారు. పనులు ప్రారంభం కాకముందే శిలాఫలకాలపై పేర్లు ఏర్పాటు చేశారని, సంబంధిత అనుమతులు, ప్రొసీడింగ్స్ లేవని కూటమి నాయకులు అభ్యంతరం వ్యక్తం చేసినట్లు ఆయన తెలిపారు. ఈ నేపథ్యంలో జిల్లా కలెక్టర్ కార్యాలయం నుంచి వచ్చిన సంబంధిత ప్రొసీడింగ్స్ కాపీలను వారికి అందజేస్తానని తాను హామీ ఇచ్చినట్లు పేర్కొన్నారు. శిలాఫలకాల కూల్చివేత వంటి ఘటనలు ప్రజాస్వామ్య పద్ధతులకు విరుద్ధమని గ్రీష్మంత్ రెడ్డి అన్నారు. ఘటనపై పూర్తి వివరాలు, ఇరువర్గాల వాదనలు, సంబంధిత అధికారుల వివరణ వెలుగులోకి రావాల్సి ఉంది.
harib8233- September 24, 2026
- 0 Comments
- 27 Views
-
