ప్రజా సమస్యలపై సీపీఐ పోరుబాట

బద్రాద్రి కొత్తగూడెం,చుంచుపల్లి మండలం, ఆగస్టు 11, (పున్నమి ప్రతినిధి) కుంటుపడిన కొత్తగూడెం అభివృద్ధిని గాడిలో పెట్టింది సీపీఐనేనని ఆ పార్టీ జిల్లా కార్యదర్శి ఎస్‌కే సాబీర్ పాషా అన్నారు. పట్టణంలో నిర్వహిస్తున్న 5వ రోజు ప్రజాచైతన్య యాత్రలో భాగంగా ఆటా పాటలతో ప్రజలను చైతన్యపరిచారు. ఈ సందర్భంగా ఆయన మాట్లాడుతూ ఇండ్లు, ఇండ్ల స్థలాల క్రమబద్ధీకరణ కోసం ప్రభుత్వం వెంటనే చర్యలు తీసుకోవాలని డిమాండ్ చేశారు. క్రమబద్ధీకరణకు సంబంధించిన జీవో 76ను అమలు చేయకుండా బుట్టదాఖలు చేస్తే ఊరుకునేది లేదని హెచ్చరించారు. అర్హులైన ప్రతి పేద కుటుంబానికి ఇళ్లు, సంక్షేమ పథకాలు అందేలా ప్రభుత్వం చర్యలు తీసుకోవాలని కోరారు. కొత్తగూడెం నియోజకవర్గ అభివృద్ధికి ప్రభుత్వం సహకరించాలని, ప్రజా, కార్మిక, రైతు వ్యతిరేక విధానాలను ప్రశ్నిస్తూ ప్రజల తరఫున పోరాడుతామని సాబీర్ పాషా స్పష్టం చేశారు. కేంద్ర ప్రభుత్వం తన విధానాలను మార్చుకోకపోతే ప్రజాగ్రహానికి గురికాక తప్పదని హెచ్చరించారు. ప్రజా సమస్యల పరిష్కారం కోసం సీపీఐ పోరాటాలు కొనసాగిస్తుందని తెలిపారు.