బీమా

ప్రీమియం కంటే ప్రజలకు బీమా ముఖ్యం: ఐఆర్‌డీఏఐ చైర్మన్‌ అజయ్‌ సేథ్‌

ప్రీమియం కంటే ప్రజలకు బీమా ముఖ్యం విస్తృత రక్షణ, సత్వర క్లెయిమ్‌లపై ఐఆర్‌డీఏఐ దృష్టి ముంబయి, అక్టోబర్‌ 28: బీమా సంస్థల విజయాన్ని ప్రీమియం వసూళ్లతోనే కాకుండా, ఎంతమందికి సమర్థమైన రక్షణ అందించాయన్న ప్రాతిపదికన అంచనా వేయాలని ఐఆర్‌డీఏఐ చైర్మన్‌ అజయ్‌ సేథ్‌ సూచించారు. ముంబయిలో జరిగిన బిజినెస్‌ స్టాండర్డ్‌ బీఎఫ్‌ఎస్‌ఐ సమావేశంలో ఆయన మాట్లాడారు. ఇప్పటికే పాలసీలున్న వారి నుంచి అధిక ప్రీమియం పొందడంపై దృష్టిపెట్టడంతోపాటు, బీమా లేని కుటుంబాలకు అందుబాటు ధరల్లో రక్షణ కల్పించాలని పేర్కొన్నారు. పాలసీదారుడు చెల్లించే ప్రతి రూపాయికి లభించే ప్రయోజనం, క్లెయిమ్‌ల పరిష్కార వేగం, పారదర్శకతకు ప్రాధాన్యం ఇవ్వాలన్నారు. ఆరోగ్య బీమాలో కొత్త పాలసీలు, రెన్యూవల్స్‌ కలిపి సగటు కమీషన్‌ సుమారు 24 శాతంగా ఉందని, దాన్ని 15–20 శాతానికి తీసుకురావడం ప్రతిపాదనల లక్ష్యమని వివరించారు. అధిక పంపిణీ ఖర్చులు ప్రీమియంపై ఒత్తిడి పెంచుతాయని తెలిపారు. ఆన్‌లైన్‌ వేదికలు వినియోగదారులకు పాలసీలు, ధరలను సులభంగా పోల్చుకునే అవకాశం కల్పించాలని సూచించారు. డైనమిక్‌ ప్రైసింగ్‌ను వ్యతిరేకించారు. ఆరోగ్య బీమాలో క్యాష్‌లెస్‌ చికిత్స వాటాను ప్రస్తుతం ఉన్న సుమారు 60 శాతం నుంచి దీర్ఘకాలంలో 90 శాతానికి పెంచాలని లక్ష్యంగా పేర్కొన్నారు. పాలసీ పోర్టబిలిటీ నిర్ణయాలను కమీషన్లు ప్రభావితం చేస్తున్నాయా అనే అంశాన్ని పరిశీలిస్తున్నట్లు తెలిపారు. సంబంధిత వర్గాలతో సంప్రదింపుల అనంతరమే సంస్కరణలు ఖరారవుతాయని స్పష్టం చేశారు. ప్రతిపాదనలపై అభిప్రాయాల గడువు అక్టోబర్‌ 31 వరకు ఉంది. ఇవి ఇంకా తుది అమలు నిబంధనలు కావు.