ఖమ్మం, జులై
(పున్నమి న్యూస్)
ఓటరు జాబితా ప్రత్యేక సవరణ కార్యక్రమం **SIR (స్పెషల్ ఇంటెన్సివ్ రివిజన్)**పై ప్రజల్లో అవగాహన కల్పించేందుకు భారతీయ జనతా పార్టీ ఖమ్మం జిల్లా వ్యాప్తంగా విస్తృత పర్యటనలు నిర్వహిస్తోంది. కేంద్ర ఎన్నికల సంఘం చేపట్టిన ఈ కార్యక్రమం ప్రాముఖ్యతను ప్రజలకు వివరించడం, అర్హులైన ప్రతి ఒక్కరూ తమ ఓటరు వివరాలను సరిచేసుకొని నమోదు చేసుకోవాలని సూచించడం లక్ష్యంగా పార్టీ నాయకులు గ్రామాలు, పట్టణాల్లో విస్తృతంగా పర్యటిస్తున్నారు.
ఖమ్మం అసెంబ్లీ నియోజకవర్గ పరిధిలోని టూ టౌన్ ప్రాంతంలో బీజేపీ తెలంగాణ రాష్ట్ర కార్యవర్గ సభ్యులు గల్లా సత్యనారాయణ పర్యటించి ప్రజలతో మమేకమయ్యారు. SIR ప్రక్రియపై అవగాహన కల్పిస్తూ ఓటరు జాబితాలో పేర్లు, వివరాలు సరిచూసుకోవాలని సూచించారు. ఈ కార్యక్రమంలో టూ టౌన్ అధ్యక్షుడు ధనియాకుల వెంకట్ నారాయణతో పాటు టూ టౌన్ కమిటీ సభ్యులు పాల్గొన్నారు.
పాలేరు నియోజకవర్గంలో బీజేపీ కిసాన్ మోర్చా తెలంగాణ రాష్ట్ర మాజీ అధ్యక్షులు కొండపల్లి శ్రీధర్ రెడ్డి, ఖమ్మం పార్లమెంట్ మాజీ అభ్యర్థి తాండ్రా వినోద్ రావు ఆధ్వర్యంలో విస్తృత పర్యటనలు నిర్వహించారు. గ్రామాల్లో ప్రజలను కలుసుకుని SIR కార్యక్రమం ఉద్దేశ్యం, ఓటరు నమోదు, వివరాల సవరణ ప్రక్రియపై అవగాహన కల్పించారు. ఈ కార్యక్రమంలో పాలేరు అసెంబ్లీ పరిధి పార్టీ నాయకులు, కార్యకర్తలు పెద్ద సంఖ్యలో పాల్గొన్నారు.
సత్తుపల్లి నియోజకవర్గంలో సీనియర్ నాయకులు మండదపు సుబ్బారావు, పెరుమాళ్లపల్లి విజయరాజు, ఈవి రమేష్, సుదర్శన్ మిశ్రా పర్యటించి స్థానిక ప్రజలకు SIR కార్యక్రమం గురించి వివరించారు. గ్రామాల వారీగా ప్రజలతో సమావేశాలు నిర్వహిస్తూ ప్రతి అర్హుడూ ఓటరు జాబితాలో తన పేరు నమోదు చేసుకునేలా కృషి చేయాలని పిలుపునిచ్చారు. స్థానిక పార్టీ నాయకులు, కార్యకర్తలు కార్యక్రమాల్లో చురుకుగా పాల్గొన్నారు.
వైరా నియోజకవర్గంలో భూక్యా శ్యాంసుందర్ నాయక్, తాండ్రా వినోద్ రావు పర్యటించి ప్రజలను కలుసుకున్నారు. ఓటరు నమోదు ప్రక్రియపై సందేహాలను నివృత్తి చేస్తూ, అవసరమైన పత్రాలతో SIR ప్రక్రియలో భాగస్వాములు కావాలని కోరారు. స్థానిక నాయకులు, కార్యకర్తలు కార్యక్రమాన్ని విజయవంతం చేశారు.
మధిర నియోజకవర్గంలో కూడా బీజేపీ నాయకులు విస్తృత పర్యటనలు నిర్వహించి ప్రజల్లో అవగాహన కల్పించారు. గ్రామాలు, వార్డుల వారీగా సమావేశాలు ఏర్పాటు చేసి SIR కార్యక్రమం ప్రాముఖ్యతను వివరించారు.
అలాగే పార్టీ జాతీయ నాయకులు పొంగులేటి సుధాకర్ రెడ్డి జిల్లా పర్యటనలో భాగంగా సత్తుపల్లి, పాలేరు, ఖమ్మం తదితర నియోజకవర్గాల్లో పర్యటించి పార్టీ నాయకులు, కార్యకర్తలకు దిశానిర్దేశం చేశారు. SIR కార్యక్రమాన్ని ప్రజల్లోకి మరింత విస్తృతంగా తీసుకెళ్లాలని, అర్హులైన ప్రతి ఓటరికి ఈ ప్రక్రియపై అవగాహన కల్పించేలా క్షేత్రస్థాయిలో పనిచేయాలని సూచించారు.
జిల్లా వ్యాప్తంగా కొనసాగుతున్న ఈ అవగాహన కార్యక్రమాలకు బీజేపీ నాయకులు, కార్యకర్తలు పెద్ద ఎత్తున హాజరవుతూ, ప్రజలతో ప్రత్యక్షంగా మమేకమై SIR కార్యక్రమాన్ని విజయవంతం చేసేందుకు కృషి చేస్తున్నారు.
