🏆 పరిశుభ్రతే పాఠశాల ఆభరణం… పచ్చదనమే అభివృద్ధికి ప్రతీక!
విశాఖపట్నం జిల్లా, ఆనందపురం , అక్టోబర్ 2 (పున్నమి ప్రతినిధి) ::
పరిశుభ్రత, పారిశుద్ధ్యం, పర్యావరణ పరిరక్షణలో విశేష కృషి చేస్తూ ఆదర్శంగా నిలిచిన KGBV ఆనందపురంకు ప్రతిష్ఠాత్మక స్వచ్ఛ ఆంధ్ర అవార్డు లభించింది. ఈ పురస్కారం పాఠశాల విద్యార్థులు, ఉపాధ్యాయులు, పేరెంట్స్ కమిటీ సభ్యులు సిబ్బంది సమిష్టి కృషికి దక్కిన గౌరవంగా నిలిచింది.
పాఠశాలలో పరిశుభ్రమైన వాతావరణాన్ని నిరంతరం కొనసాగిస్తూ, తడి–పొడి చెత్తను వేరు చేయడం, మూడు బిన్ల ద్వారా చెత్త నిర్వహణ, విద్యార్థుల్లో పరిశుభ్రతపై అవగాహన కల్పించడం, పచ్చదనాన్ని పెంపొందించడం వంటి కార్యక్రమాలను క్రమం తప్పకుండా నిర్వహిస్తున్నారు.
“చిన్న చేతులతో మొదలైన స్వచ్ఛత… సమాజానికి గొప్ప సందేశంగా మారింది” అన్నట్టుగా KGBV విద్యార్థులు పరిశుభ్రతను తమ రోజువారీ జీవితంలో భాగంగా చేసుకోవడం ప్రత్యేక ఆకర్షణగా నిలిచింది.
పాఠశాల అభివృద్ధికి నిరంతరం సహకరిస్తున్న శ్రీ ఘట్టమనేని సుభాష్ చంద్రబోస్ గారి ప్రోత్సాహం స్వచ్ఛత, పచ్చదనం, విద్యార్థుల సమగ్ర అభివృద్ధికి ఎంతో ఉపయోగపడుతోందని ప్రిన్సిపాల్ శ్రీమతి దొండా చంద్రకళ తెలిపారు.
ఈ అవార్డు ఒక్కరి కృషి ఫలితం కాదని, విద్యార్థులు, ఉపాధ్యాయులు, పేరెంట్స్ కమిటీ సభ్యులు సిబ్బంది పాఠశాల అభివృద్ధికి సహకరిస్తున్న దాతల సమిష్టి కృషికి దక్కిన గౌరవమని ఆమె పేర్కొన్నారు. అవార్డు సాధనకు కృషి చేసిన ప్రతి ఒక్కరినీ అభినందించారు.
“పరిశుభ్రమైన పాఠశాల – ఆరోగ్యకరమైన సమాజం” అనే సందేశంతో స్వచ్ఛత, పచ్చదనం కార్యక్రమాలను మరింత ఉత్సాహంగా కొనసాగిస్తామని ప్రిన్సిపాల్ తెలిపారు.
🌱 KGBV ఆనందపురం సందేశం ఒక్కటే…
“పరిశుభ్రతను అలవాటుగా చేసుకుంటే… పచ్చదనాన్ని బాధ్యతగా భావిస్తే… రేపటి సమాజం మరింత ఆరోగ్యంగా, అందంగా ఉంటుంది!”
