డా. బి.ఆర్. అంబేద్కర్ కోనసీమ జిల్లా రాజోలు మండలం పాలగుమ్మి గ్రామస్తులు పర్యావరణ పరిరక్షణకు వినూత్న నిర్ణయం తీసుకున్నారు. గ్రామాన్ని ప్లాస్టిక్ రహితంగా తీర్చిదిద్దే లక్ష్యంతో శుభకార్యాలు, ఇతర కార్యక్రమాల్లో పేపర్ ప్లేట్లు, ప్లాస్టిక్ గ్లాసులకు బదులుగా స్టీల్ ప్లేట్లు, గ్లాసులను వినియోగించాలని నిర్ణయించారు. ఇందులో భాగంగా గ్రామస్తులు వెయ్యి స్టీల్ ప్లేట్లు, 600 స్టీల్ గ్లాసులు కొనుగోలు చేశారు. గ్రామంలో ఎవరి ఇంట్లో శుభకార్యం జరిగినా అవసరమైన పాత్రలను గ్రామం నుంచి తీసుకెళ్లి వినియోగించుకుని, కార్యక్రమం అనంతరం తిరిగి అప్పగించే విధానాన్ని ఏర్పాటు చేశారు. ఒకసారి వినియోగించి పడేసే ప్లాస్టిక్, పేపర్ వస్తువుల వల్ల పెరుగుతున్న చెత్తను తగ్గించడంతో పాటు ఖర్చు కూడా ఆదా అవుతుందని గ్రామస్తులు తెలిపారు. పాలగుమ్మి ప్రజల నిర్ణయం పర్యావరణ పరిరక్షణకు ఆదర్శంగా నిలుస్తూ, ఇతర గ్రామాలకు స్ఫూర్తిగా మారుతోంది.
