కొమరం భీమ్ ఆసిఫాబాద్ జిల్లా పున్నమి ప్రతినిధి
కాగజ్నగర్, ఆగస్టు 3: విద్యార్థుల్లో ఆత్మవిశ్వాసం, పట్టుదల, క్రమశిక్షణ, సృజనాత్మకత వంటి విలువలను పెంపొందించాలనే ఉద్దేశ్యంతో కాగజ్నగర్లోని ఫాతిమా కాన్వెంట్ హైస్కూల్లో ప్రముఖ బాలల చిత్రం **”హవా హవాయ్ (Hawaa Hawaai)”**ను ప్రత్యేకంగా ప్రదర్శించారు.
ఈ కార్యక్రమానికి మండల విద్యాధికారి శ్రీ వాసాల ప్రభాకర్ గారు ముఖ్య అతిథిగా హాజరై చిత్ర ప్రదర్శనను ప్రారంభించారు. ఈ సందర్భంగా ఆయన మాట్లాడుతూ, పాఠ్యపుస్తకాలతో పాటు మంచి సందేశాన్ని అందించే చిల్డ్రన్స్ ఫిల్మ్స్ విద్యార్థుల వ్యక్తిత్వ వికాసానికి ఎంతో దోహదపడతాయని అన్నారు. కష్టపడితే ఏ లక్ష్యాన్నైనా సాధించవచ్చనే స్ఫూర్తిదాయక సందేశాన్ని హవా హవాయ్ చిత్రం అందిస్తుందని పేర్కొన్నారు.
కార్యక్రమంలో పాఠశాల ప్రిన్సిపాల్, ఉపాధ్యాయులు, సిబ్బంది పాల్గొన్నారు. వందలాది మంది విద్యార్థులు చిత్రాన్ని ఆసక్తిగా వీక్షించి, చిత్రంలోని సందేశాన్ని అభినందించారు.
ఈ చిత్ర ప్రదర్శన కార్యక్రమాన్ని చిల్డ్రన్స్ ఫిల్మ్ ఆర్గనైజర్ శ్రీ ఉప్పరి నరేష్ సమన్వయం చేశారు. ఈ సందర్భంగా ఆయన మాట్లాడుతూ, విద్యార్థుల్లో మంచి విలువలు, స్ఫూర్తి, సానుకూల ఆలోచనలను పెంపొందించే చిల్డ్రన్స్ ఫిల్మ్స్ను మరిన్ని పాఠశాలల్లో కూడా ప్రదర్శించేందుకు కృషి చేస్తామని తెలిపారు.
