గ్రీన్ ఫార్మా సిటీ పోలీస్ స్టేషన్ను ఆకస్మికంగా తనిఖీ చేసిన డీసీపీ కె. నారాయణ రెడ్డి
స్టేషన్ పనితీరుపై సమీక్ష.. ప్రజలకు మెరుగైన పోలీసు సేవలు అందించాలని అధికారులకు ఆదేశాలు
హైదరాబాద్ గ్రీన్ ఫార్మా సిటీ, జూలై 16:
మహేశ్వరం జోన్ పరిధిలోని హైదరాబాద్ గ్రీన్ ఫార్మా సిటీ పోలీస్ స్టేషన్ను డిప్యూటీ కమిషనర్ ఆఫ్ పోలీస్ (డీసీపీ) శ్రీ కె. నారాయణ రెడ్డి, ఐపీఎస్ గురువారం ఆకస్మికంగా తనిఖీ చేశారు. పోలీస్ స్టేషన్ పనితీరును సమగ్రంగా పరిశీలించిన ఆయన, చట్ట అమలు, నేర నియంత్రణ, ప్రజలకు అందుతున్న సేవలపై అధికారులతో సమీక్ష నిర్వహించారు.
ఈ సందర్భంగా పోలీస్ స్టేషన్లో నిర్వహిస్తున్న రికార్డులు, జనరల్ డైరీ, వివిధ రిజిస్టర్లు, పెండింగ్ కేసుల వివరాలు, కేసుల దర్యాప్తు పురోగతి, నేరాల నమోదు విధానం, శాంతిభద్రతల పరిరక్షణ చర్యలు, బందోబస్తు ఏర్పాట్లు, బీట్ వ్యవస్థ అమలు, రాత్రి గస్తీ నిర్వహణ తదితర అంశాలను క్షుణ్ణంగా పరిశీలించారు. ప్రతి కేసును నాణ్యతతో, చట్టబద్ధంగా, నిర్దేశిత గడువులో పూర్తి చేసేలా అధికారులు చర్యలు తీసుకోవాలని సూచించారు.
పోలీస్ స్టేషన్ పరిధిలో నేరాల నివారణకు చేపడుతున్న చర్యలు, ప్రజలకు అందిస్తున్న సేవలు, మహిళల భద్రత, చిన్నారులు మరియు వృద్ధులకు సంబంధించిన ఫిర్యాదుల పరిష్కారంపై ప్రత్యేక దృష్టి సారించాలని డీసీపీ ఆదేశించారు. ప్రజల నుంచి వచ్చే ప్రతి ఫిర్యాదును సకాలంలో స్వీకరించి, బాధితులకు న్యాయం జరిగేలా వేగవంతమైన చర్యలు తీసుకోవాలని సూచించారు.
అనంతరం పోలీస్ స్టేషన్ సిబ్బందితో సమావేశమైన డీసీపీ, వారి విధి నిర్వహణలో క్రమశిక్షణ, ప్రజలతో మర్యాదపూర్వక వ్యవహారం, సేవాభావం అత్యంత ముఖ్యమని తెలిపారు. పోలీసులపై ప్రజల్లో మరింత విశ్వాసం పెరిగేలా పారదర్శకంగా పనిచేయాలని, ప్రతి అధికారి బాధ్యతాయుతంగా విధులు నిర్వహించాలని సూచించారు. అలాగే రాత్రి గస్తీని మరింత పటిష్టం చేయడంతో పాటు అనుమానాస్పద వ్యక్తులు, నేర కార్యకలాపాలపై నిరంతరం నిఘా ఉంచాలని ఆదేశించారు.
ఈ ఆకస్మిక తనిఖీలో మహేశ్వరం సబ్ డివిజన్ ఏసీపీ కె.పి.వి. రాజు, హైదరాబాద్ గ్రీన్ ఫార్మా సిటీ పోలీస్ స్టేషన్ ఇన్స్పెక్టర్ బి. సత్యనారాయణ, ఎస్ఐలు డి. సునీల్ కుమార్, జి. సైదులుతో పాటు పోలీస్ స్టేషన్ సిబ్బంది పాల్గొన్నారు. డీసీపీ పర్యటనతో స్టేషన్ సిబ్బంది మరింత అప్రమత్తంగా విధులు నిర్వహించాలని అధికారులు పేర్కొన్నారు.
