రంగులు మారుతున్న ఆర్టీసీ బస్సులు… ప్రజల జేబులకు చిల్లులు!

రంగులు మారుతున్న ఆర్టీసీ బస్సులు… ప్రజల జేబులకు చిల్లులు! బస్సుల బోర్డుల రంగులు మార్చి అధిక చార్జీలు వసూలు చేస్తున్నారని ప్రయాణికుల ఆరోపణలు – ఇబ్రహీంపట్నం డిపోపై ప్రశ్నల వర్షం రంగారెడ్డి జిల్లా, ఇబ్రహీంపట్నం: తెలంగాణ రాష్ట్ర రోడ్డు రవాణా సంస్థ (RTC)లో బస్సుల వర్గీకరణ విషయంలో గందరగోళం నెలకొంటోందని ప్రయాణికులు ఆందోళన వ్యక్తం చేస్తున్నారు. ముఖ్యంగా రంగారెడ్డి జిల్లా ఇబ్రహీంపట్నం డిపో పరిధిలో నడిచే కొన్ని బస్సులకు అసలు సర్వీస్‌కు భిన్నంగా బోర్డుల రంగులు వేయడం వల్ల ప్రయాణికులు అయోమయానికి గురవుతున్నారని ఆరోపిస్తున్నారు. సాధారణంగా పల్లె వెలుగు, సిటీ ఆర్డినరీ, ఎక్స్‌ప్రెస్, సెమీ డీలక్స్ వంటి బస్సులకు ప్రత్యేక రంగులు, ప్రత్యేక గుర్తింపులు ఉంటాయి. అయితే కొన్ని బస్సులకు వాటి అసలు కేటగిరీకి భిన్నంగా బోర్డుల రంగులు వేయడంతో ప్రయాణికులు వాటిని వేరే సర్వీస్‌గా భావించి అధిక చార్జీలు చెల్లించాల్సి వస్తోందని పలువురు వాపోతున్నారు. ఇబ్రహీంపట్నం డిపోలో సిటీ ఆర్డినరీ బస్సులకు ఎక్స్‌ప్రెస్ రంగులు, పల్లె వెలుగు బస్సులకు ఎక్స్‌ప్రెస్ బోర్డులు, ఎక్స్‌ప్రెస్ బస్సులకు సెమీ డీలక్స్ తరహా రంగులు వేస్తున్నారని స్థానికులు ఆరోపిస్తున్నారు. దీంతో ఏ బస్సు ఏ కేటగిరీకి చెందినదో సామాన్య ప్రయాణికుడు గుర్తించలేని పరిస్థితి ఏర్పడిందని చెబుతున్నారు. ప్రతిరోజూ ఉద్యోగులు, విద్యార్థులు, రైతులు, కూలీలు వేల సంఖ్యలో ఆర్టీసీ బస్సులపై ఆధారపడుతున్నారు. అలాంటి సమయంలో బస్సుల గుర్తింపులో స్పష్టత లేకపోవడం వల్ల ప్రయాణికులు అనవసరంగా అధిక చార్జీలు చెల్లించాల్సి వస్తోందని వారు ఆవేదన వ్యక్తం చేస్తున్నారు. ముఖ్యంగా గ్రామీణ ప్రాంతాల నుంచి వచ్చే ప్రజలు బస్సు కేటగిరీపై పూర్తి అవగాహన లేకపోవడంతో ఎక్కువగా నష్టపోతున్నారని పేర్కొంటున్నారు. ప్రజల నుంచి వసూలు చేస్తున్న చార్జీలు బస్సు కేటగిరీకి అనుగుణంగానే ఉన్నాయా? లేక బోర్డుల రంగులు మార్చి గందరగోళం సృష్టిస్తున్నారా? అనే అనుమానాలు వ్యక్తమవుతున్నాయి. దీనిపై ఉన్నతాధికారులు విచారణ జరిపి వాస్తవాలను వెలుగులోకి తీసుకురావాలని ప్రయాణికులు డిమాండ్ చేస్తున్నారు. బస్సులపై స్పష్టమైన కేటగిరీ వివరాలు, చార్జీల పట్టిక, సర్వీస్ రకం వంటి సమాచారాన్ని తప్పనిసరిగా ప్రదర్శించాలని, బోర్డుల రంగులను నిబంధనలకు అనుగుణంగా ఉంచాలని ప్రజలు కోరుతున్నారు. ప్రయాణికుల ప్రయోజనాలను దృష్టిలో ఉంచుకుని రాష్ట్ర ఆర్టీసీ యాజమాన్యం తక్షణమే స్పందించి, ఈ అంశంపై స్పష్టత ఇవ్వడంతో పాటు అవసరమైతే విచారణ చేపట్టి బాధ్యులపై చర్యలు తీసుకోవాలని విజ్ఞప్తి చేస్తున్నారు.