బూర్గంపాడు మండల కేంద్రంలో చేతిపంపు మాయం.. విచారణకు స్థానికుల డిమాండ్

బూర్గంపాడు, ఆగస్టు 5: భద్రాద్రి కొత్తగూడెం జిల్లా బూర్గంపాడు మండల కేంద్రంలో ఎన్నో ఏళ్లుగా ప్రజలకు తాగునీటి అవసరాలను తీర్చిన ప్రభుత్వ చేతిపంపు అదృశ్యమైన ఘటనపై స్థానికుల్లో ఆందోళన వ్యక్తమవుతోంది. చేతిపంపును ఎవరు తొలగించారు? ఎలాంటి అనుమతులతో తొలగించారు? అనే అంశాలపై స్పష్టత ఇవ్వాలని ప్రజలు కోరుతున్నారు. చేతిపంపు మాయం అయినప్పటికీ సంబంధిత అధికారులు ఇప్పటివరకు అధికారికంగా స్పందించకపోవడం పలు అనుమానాలకు తావిస్తోందని స్థానికులు పేర్కొంటున్నారు. ఘటనపై సమగ్ర విచారణ చేపట్టి, ప్రభుత్వ ఆస్తి తొలగింపునకు బాధ్యులెవరో గుర్తించి తగిన చర్యలు తీసుకోవాలని డిమాండ్ చేస్తున్నారు. అయితే ఈ ఘటనలో కొందరు అధికార పార్టీ నాయకుల ప్రమేయం ఉందంటూ సామాజిక మాధ్యమాల్లో, స్థానికంగా ప్రచారం జరుగుతోంది. అయితే ఈ ఆరోపణలకు సంబంధించి ఇప్పటి వరకు ఎలాంటి అధికారిక ఆధారాలు లేదా ధృవీకరణ వెలువడలేదు. చేతిపంపు తొలగింపుపై పూర్తి స్థాయిలో దర్యాప్తు జరిపి వాస్తవాలను ప్రజలకు వెల్లడించాలని మండల ప్రజలు, పలువురు రాజకీయ విశ్లేషకులు కోరుతున్నారు.