అమరావతిలో కేంద్ర ఉద్యోగుల కోసం ₹2,533 కోట్ల మౌలిక వసతులు

ఆంధ్రప్రదేశ్ రాజధాని అమరావతి అభివృద్ధికి కేంద్ర ప్రభుత్వం మరో కీలక నిర్ణయం తీసుకుంది. ప్రధానమంత్రి నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశంలో కేంద్ర ప్రభుత్వ ఉద్యోగుల కోసం రూ.2,533 కోట్ల విలువైన రెండు ప్రధాన ప్రాజెక్టులకు ఆమోదం లభించింది. ఈ ప్రాజెక్టుల్లో కేంద్ర ప్రభుత్వ సాధారణ కార్యాలయ సముదాయం (CGGPOA) మరియు నివాస సముదాయం (GPRA) ఉన్నాయి. కార్యాలయ సముదాయ నిర్మాణానికి రూ.1,299 కోట్లు, నివాస సముదాయానికి రూ.1,234 కోట్లు కేటాయించారు. ఈ ప్రాజెక్టుల ద్వారా లక్షల చదరపు అడుగుల విస్తీర్ణంలో ఆధునిక సదుపాయాలు కల్పించనున్నారు. పర్యావరణ హిత నిర్మాణాలు, శక్తి పొదుపు సాంకేతికతలు, వికలాంగులకు అనుకూలమైన సదుపాయాలతో ఈ భవనాలను రూపొందించనున్నారు. కేంద్ర ప్రభుత్వ విభాగాలు, ఉద్యోగులకు అత్యాధునిక వసతులు అందుబాటులోకి రానున్నాయి. అమరావతి అభివృద్ధికి ఇది కీలక మైలురాయిగా భావిస్తున్నారు. ఈ ప్రాజెక్టుల అమలుతో ఉపాధి అవకాశాలు పెరగడంతో పాటు రాజధాని ప్రాంతంలో ఆర్థిక కార్యకలాపాలు కూడా వేగవంతమవుతాయని అధికారులు తెలిపారు.