అక్రమ షెడ్ల నిర్మాణం జోరు… అధికారుల మౌనం ఎందుకు?

అక్రమ షెడ్ల నిర్మాణం జోరు… అధికారుల మౌనం ఎందుకు? రంగారెడ్డి జిల్లా, ఇబ్రహీంపట్నం నియోజకవర్గంలో నిబంధనలకు విరుద్ధంగా షెడ్ల నిర్మాణాలు కొనసాగుతున్నాయనే ఆరోపణలు వినిపిస్తున్నాయి. సంబంధిత శాఖల అనుమతులు లేకుండానే భారీ ఇనుప షెడ్లు నిర్మిస్తున్నారని స్థానికులు ఆరోపిస్తున్నారు. నిర్మాణ పనులు బహిరంగంగానే జరుగుతున్నప్పటికీ అధికారులు మాత్రం చూసీ చూడనట్లు వ్యవహరిస్తున్నారనే విమర్శలు వ్యక్తమవుతున్నాయి. స్థానికుల కథనం ప్రకారం, వ్యవసాయ భూములు, గ్రామపంచాయతీ పరిధిలోని ప్రాంతాల్లో అనుమతులు తీసుకోకుండా పెద్ద ఎత్తున పరిశ్రమల తరహా షెడ్లు నిర్మిస్తున్నారు. కొన్నిచోట్ల పూర్తిస్థాయి కాంపౌండ్ వాల్ నిర్మించి, భారీ స్టీల్ నిర్మాణాలు వేగంగా సాగుతున్నప్పటికీ సంబంధిత అధికారులు తనిఖీలు చేపట్టడం లేదని అంటున్నారు. నిబంధనలు పాటించకుండా జరుగుతున్న ఈ నిర్మాణాలపై ఎవరూ చర్యలు తీసుకోకపోవడంతో అక్రమ నిర్మాణాలకు మరింత ప్రోత్సాహం లభిస్తోందని ప్రజలు ఆవేదన వ్యక్తం చేస్తున్నారు. గ్రామపంచాయతీ, టౌన్ ప్లానింగ్, రెవెన్యూ, పరిశ్రమల శాఖల అనుమతులు ఉన్నాయా? భూ వినియోగ మార్పు (Conversion) జరిగిందా? పర్యావరణ అనుమతులు పొందారా? అనే అనేక ప్రశ్నలు తలెత్తుతున్నాయి. ప్రజాప్రతినిధులు, స్థానికులు పలుమార్లు ఫిర్యాదులు చేసినా అధికారులు స్పందించడం లేదని ఆరోపిస్తున్నారు. అక్రమ నిర్మాణాలు కొనసాగితే భవిష్యత్తులో రోడ్లు, డ్రైనేజీ, విద్యుత్, ప్రజా భద్రత వంటి సమస్యలు తలెత్తే అవకాశం ఉందని స్థానికులు చెబుతున్నారు. నిబంధనలు పాటించే వారికంటే అక్రమంగా నిర్మాణాలు చేపట్టే వారికే ప్రోత్సాహం లభిస్తోందనే అభిప్రాయం వ్యక్తమవుతోంది. దీంతో ప్రభుత్వంపై ప్రజల విశ్వాసం దెబ్బతింటోందని అంటున్నారు. ఈ నేపథ్యంలో జిల్లా కలెక్టర్, టౌన్ ప్లానింగ్, రెవెన్యూ, పంచాయతీ రాజ్ శాఖల ఉన్నతాధికారులు వెంటనే క్షేత్రస్థాయిలో విచారణ చేపట్టి, అనుమతులు లేకుండా నిర్మించిన షెడ్లపై చట్టపరమైన చర్యలు తీసుకోవాలని ప్రజలు డిమాండ్ చేస్తున్నారు. అక్రమ నిర్మాణాలను అడ్డుకొని పారదర్శక పరిపాలన అందించాలని కోరుతున్నారు.