నేరాలు-ఘోరాలు

*“సమాజంలో పెరుగుతున్న నేరాలు”* * నేరాల నీడలో సమాజం నిన్నటి మనిషిలో కనిపించిన మానవత్వం ఎక్కడ పోయింది? నేడు మనిషి మనిషినే చూసి ఎందుకు భయపడుతున్నాడు? అసూయల మంటలు పెరిగాయి, అత్యాశల వలలు విస్తరించాయి, కోపానికి హద్దులు లేక క్రూరత్వానికి రూపమొచ్చింది! మత్తు పదార్థాల మాయలో యువత దారి తప్పుతోంది, సాంకేతికతను సద్వినియోగం చేయక సైబర్ నేరాలకు పాల్పడుతోంది! ఆడబిడ్డకు రక్షణ కావాలి, వృద్ధులకు భరోసా కావాలి, బలహీనులకు న్యాయం కావాలి— సమాజం మేల్కొనాలి! నేరం పెరిగిందని నిశ్శబ్దంగా ఉండకూడదు, అన్యాయం కనిపించినప్పుడు ధైర్యంగా ప్రశ్నించాలి! చట్టం తన పని చేయాలి, ప్రజలు తమ బాధ్యతను నిర్వర్తించాలి, మానవత్వం మళ్లీ మేల్కొంటే నేరాల చీకటి తొలగిపోతుంది! మంచితనం మన ఆయుధం, మానవత్వం మన బలం; నేరరహిత సమాజమే మనందరి మహా స్వప్నం! మేల్కో సమాజమా! వీధుల్లో భయం ఎందుకు? ఇళ్లలో ఆందోళన ఎందుకు? మనిషి పక్కనున్న మనిషిని అనుమానించే పరిస్థితి ఎందుకు? డబ్బు కోసం దోపిడీలు, కోపం కోసం హత్యలు, అత్యాశ కోసం మోసాలు, అవకాశం కోసం నేరాలు! మొబైల్ చేతిలో ఉంటే జ్ఞానం పెరగాలి గానీ, మోసాల బాట పట్టి జీవితాలు నాశనం కాకూడదు! యువతకు దిశ కావాలి, పిల్లలకు విలువలు కావాలి, కుటుంబాల్లో ప్రేమ కావాలి, సమాజంలో బాధ్యత కావాలి! నేరాన్ని చూసి మౌనంగా ఉండకు, బాధితుడిని చూసి దూరంగా పోకు, అన్యాయానికి ఎదురు నిలబడు— అదే నిజమైన పౌర ధర్మం! మేల్కో సమాజమా… మార్పుకు నాంది పలుకు! మానవత్వపు వెలుగుతో నేరాల చీకటిని తరిమికొట్టు! నేరరహిత సమాజం చట్టాలు ఎన్నున్నా చైతన్యం లేకపోతే ఏమి లాభం? కాపలాలు ఎన్నున్నా బాధ్యత లేకపోతే ఏమి ప్రయోజనం? నేరస్తుడిని శిక్షించడం మాత్రమే కాదు, నేరానికి కారణం తెలుసుకోవాలి; విద్యతో, విలువలతో, మంచి ఆలోచనలతో మనిషిని తీర్చిదిద్దాలి! కోపానికి బదులు కరుణ, ద్వేషానికి బదులు ప్రేమ, అత్యాశకు బదులు ఆత్మనిగ్రహం, హింసకు బదులు అహింస— ఇవే సమాజానికి నిజమైన ఆయుధాలు! ప్రతి ఇంటి నుంచి మార్పు రావాలి, ప్రతి హృదయంలో మానవత్వం వెలగాలి, ప్రతి పౌరుడు బాధ్యత వహించాలి, అప్పుడే నేరరహిత సమాజం నిర్మించాలి! మనమే మారుదాం— సమాజాన్ని మారుద్దాం; మనిషిలోని మంచితనాన్ని మేల్కొల్పుదాం— మానవత్వంతో కొత్త ప్రపంచాన్ని నిర్మిద్దాం! *జి అంజలీ దేవి, తెలుగు ఉపాధ్యాయురాలు, మహబూబ్నగర్ హైస్కూల్*