మూసివేసిన బాణాసంచా కేంద్రాలు తెరవాలి : సిపిఎం డిమాండ్

నిబంధనల పేరుతో నెల్లూరులో అధికారులు మూసివేయించిన బాణాసంచా తయారీ కేంద్రాలను తెరిపించి కార్మికులను వెంటనే ఆదుకోవాలని సిపిఎం నగర కార్యదర్శి కత్తి శ్రీనివాసులు జిల్లా అధికారులకు విజ్ఞప్తి చేశారు. ఈ మేరకు బుధవారం కలెక్టరేట్లో జరిగిన గ్రీవెన్స్ సెల్ లో బాధితులతో కలిసి జాయింట్ కలెక్టర్ కి వినతి పత్రం అందజేశారు. ఈ సందర్భంగా ఆయన మాట్లాడుతూ జిల్లాలో పదిమంది లైసెన్సుడు బాణసంచా తయారీ దారులు ఉన్నారని, వారి వద్ద వందమంది వరకు కార్మికులు పనిచేస్తున్నారని అన్నారు. గత నాలుగు నెలల నుండి వివిధ కారణాలు చెప్పి అధికారులు తయారీ కేంద్రాలను మూసి వేయించడంతో ఆ కుటుంబాలు రోడ్డున పడ్డాయని అన్నారు. ఇప్పటికన్నా జిల్లా అధికారులు నిబంధనలకు అనుగుణంగా ఉన్న షాపుల నిర్వహణకు వెంటనే అనుమతులు ఇచ్చి కార్మికుల కుటుంబాలను ఆదుకోవాలని ఆయన కోరారు. ఈ కార్యక్రమంలో బాణాసంచా తయారీ కేంద్రాల యజమానులు శివ, అబ్బయ్య, సుబ్రహ్మణ్యం, రాజా మరియు కార్మికులు పాల్గొన్నారు.