తొండమాన్‌పురంలో వైభవంగా శ్రీవారి కళ్యాణోత్సవం-పోటెత్తిన భక్తజనం

శ్రీ కాళహస్తి, ఆగస్టు 08, (పున్నమి టెంపుల్ న్యూస్): తొండమాన్‌పురం గ్రామంలో వేంచేసియున్న శ్రీదేవి, భూదేవి సమేత శ్రీ వేంకటేశ్వర స్వామి ఆలయంలో శ్రావణ మాస రెండవ శనివారం పురస్కరించుకుని స్వామివారి కళ్యాణోత్సవం అంగరంగ వైభవంగా జరిగింది. ఆలయ ప్రధాన పూజారి రమణదీక్షితులు గారి పర్యవేక్షణలో అర్చక బృందం శాస్త్రోక్తంగా, కన్నులపండువగా ఈ వివాహ వేడుకను నిర్వహించారు. ఉదయం నుంచే స్వామివారికి, అమ్మవార్లకు ప్రత్యేక అభిషేకాలు, విశేష అర్చనలు జరిగాయి. అనంతరం సర్వాంగ సుందరంగా అలంకరించిన కళ్యాణ మండపంలో వేద మంత్రాల నడుమ జీవకోటి కళ్యాణం కోసం శ్రీవారి ఉత్సవ మూర్తులకు కళ్యాణోత్సవాన్ని భక్తిశ్రద్ధలతో పూర్తి చేశారు. ఈ పరమ పవిత్ర కార్యక్రమాల్లో ఆలయ పూజారులు మాధవస్వామి, బాబు స్వామి, జయ స్వామి, గోపి స్వామిలు పాల్గొని భక్తులకు తీర్థప్రసాదాలు అందజేశారు. ఆలయ పరిపాలనా అధికారి (ఇన్‌స్పెక్టర్) సుధీర్, ఆనంద్ గారు కళ్యాణోత్సవ ఏర్పాట్లను దగ్గరుండి పర్యవేక్షించారు. ఈ వేడుకను తిలకించడానికి చుట్టుపక్కల ప్రాంతాల నుంచే కాకుండా, వివిధ దూర ప్రాంతాల నుంచి భక్తులు, గ్రామ ప్రజలు పెద్ద సంఖ్యలో తరలివచ్చారు. ఆలయ ప్రాంగణమంతా గోవింద నామస్మరణతో మారుమోగింది.