.png){kind=avatar}
వైజాగ్ చిల్డ్రన్స్ క్లబ్ (వి సి సి) ఆధ్వర్యంలో కొమ్మాది లోని చైతన్య ఇంజనీరింగ్ కాలేజీలో ఈనెల 28 నుండి 31 వరకు నాలుగు రోజుల పాటు నిర్వహించిన విద్యార్థుల రెసిడెన్షియల్ వేసవి శిబిరం అత్యంత ఆసక్తిదాయకంగా ముగిసింది. విశాఖ జిల్లాలోని వివిధ ప్రాంతాల నుండి ఆరో తరగతి నుండి డిగ్రీ చదువుతున్న సుమారు 250 మంది విద్యార్థులు ఈ శిబిరంలో ఉత్సాహంగా పాల్గొన్నారు.
ఈ క్యాంపులో విద్యార్థుల మేధో వికాసానికి, సామాజిక అవగాహనకు తోడ్పడేలా పలు కార్యక్రమాలు నిర్వహించారు.
మొదటి రోజు విద్యార్థులు బృందాలుగా ఏర్పడి సామాజిక అంశాలపై చిరునాటికలు ప్రదర్శించారు. ముఖ్యంగా విశాఖలో వ్యవసాయ భూములు ఫ్యాక్టరీలుగా మారుతున్న క్రమాన్ని, రైతుల కష్టాలను ప్రతిబింబిస్తూ ప్రదర్శించిన ‘రైతే రాజు’ నాటిక అందరినీ ఆలోచింపజేసింది. డిజిటలైజేషన్ ప్రభావం, వాతావరణ మార్పులు, స్త్రీ-పురుష సమానత్వం, మూఢనమ్మకాల నిర్మూలన, పుస్తకాల ప్రాధాన్యత వంటి అంశాలపై విద్యార్థులు చర్చించి ప్రదర్శనలు ఇచ్చారు. జన విజ్ఞాన వేదిక జిల్లా కార్యదర్శి వైఆర్కె ప్రసాద్ విద్యార్థులకు ‘విశ్వం రహస్యాలు-భూమి పుట్టుక’పై అవగాహన కల్పించగా, రాత్రి చెట్టును కాపాడేందుకు, బాల్యవివాహాలు పై పోరాడే కథాంశంతో కూడిన ‘గాంధీ తాత చెట్టు’ సినిమాను ప్రదర్శించారు.
రెండవ రోజు జనవిజ్ఞాన వేదిక (హైదరాబాద్) ప్రతినిధి చంద్రయ్య విద్యార్థులకు ‘ఫన్ మ్యాథ్స్, ఫన్ సైన్స్’ ద్వారా సులువుగా నేర్చుకునే పద్ధతులను, సైన్స్ మ్యాజిక్స్ను వివరించారు. కన్సర్న్ ట్రస్ట్ మేనేజింగ్ డైరెక్టర్ డాక్టర్ పీకే జోస్ మాట్లాడుతూ.. విద్యార్థులు విద్యతో పాటు సామాజిక సేవా దృక్పథాన్ని, మానవ విలువలను అలవర్చుకోవాలని పిలుపునిచ్చారు. రాత్రి వాతావరణ మార్పులు, డిజిటలైజేషన్ బిల్లులపై **‘మాక్ పార్లమెంట్’** నిర్వహించారు. విద్యార్థులు అధికార, ప్రతిపక్షాలుగా విడిపోయి బిల్లులపై చర్చించే విధానాన్ని, పార్లమెంట్ పనితీరును ప్రాక్టికల్గా నేర్చుకున్నారు. మాక్ పార్లమెంట్ ను సృజన వాణి ప్రతినిధి స్వాతి నిర్వహించారు.
మూడవ రోజు ఉదయం డాక్ యార్డ్ విశ్రాంతి ఉద్యోగి చిన్నారావు నేతృత్వంలో కాలేజీని ఆనుకుని ఉన్న కొండపైకి ట్రెక్కింగ్ నిర్వహించారు. ఇది విద్యార్థులకు సరికొత్త అనుభూతిని ఇచ్చింది. అనంతరం జువనైల్ బోర్డు మాజీ మెంబర్, ఆసరా చారిటబుల్ సొసైటీ ప్రెసిడెంట్ సునీత మాట్లాడుతూ.. పిల్లలు తెలియకుండా పడుతున్న చట్టపరమైన ఇబ్బందులు, గంజాయి, మాదకద్రవ్యాల రవాణా వంటి నేరాల గురించి వివరించి.. పోక్సో (పోక్సో) చట్టంపై, యాంగర్ కంట్రోల్పై అవగాహన కల్పించారు. మధ్యాహ్నం విశ్రాంత రైల్వే ఉద్యోగి లక్ష్మణరావు ఆధ్వర్యంలో క్విజ్, మ్యూజిక్ గేమ్స్ జరిగాయి. కథల ప్రాధాన్యత, బాలల్లో అవి తెచ్చే మానసిక మార్పుల గురించి ప్రముఖ కథా రచయిత జెపి శర్మ వివరించారు. రాత్రి విద్యార్థుల సాంస్కృతిక ప్రదర్శనలు అలరించాయి. ప్రజానాట్యమండలి బృందం సహకారాన్ని అందించింది.
నాలుగవ రోజు ఉదయం ఎల్జే నాయుడు బృందం ఆధ్వర్యంలో నిర్వహించిన ‘ట్రెజర్ హంట్’ ఆటలో విద్యార్థులు ఎంతో ఉత్సాహంగా క్లూస్ వెతుకుతూ క్యాంపస్ అంతా సందడి చేశారు. ఇది వారిలో పట్టుదలను, సునిశిత జ్ఞానాన్ని పెంపొందించింది. అనంతరం విజయ్ కుమార్ మ్యాజిక్ శిక్షణ ఇచ్చారు. వైజాగ్ చిల్డ్రన్స్ క్లబ్ వ్యవస్థాపకులు డాక్టర్ కే. రమాప్రభ విద్యార్థులతో మాట్లాడుతూ.. ప్రస్తుతం పిల్లలు ఎదుర్కొంటున్న సమస్యలు, వారి శారీరక, మానసిక అభివృద్ధిపై చర్చించారు. క్లబ్ యొక్క వార్షిక ప్రణాళికపై విద్యార్థుల నుంచి సలహాలు స్వీకరించారు.
ఈ క్యాంపు విద్యార్థుల్లో సరికొత్త ఉత్సాహాన్ని నింపిందని, ముగింపులో పిల్లలు ఇచ్చిన ఫీడ్ బ్యాక్ ద్వారా ఇది స్పష్టమైందని క్లబ్ ప్రతినిధులు తెలిపారు. ఈ శిబిరానికి వసతి కల్పించిన చైతన్య కాలేజీ యాజమాన్యానికి, సహకరించిన దాతలకు, అతిథులకు, వాలంటీర్లకు పిల్లలను పంపిన తల్లిదండ్రులకు వైజాగ్ చిల్డ్రన్స్ క్లబ్ తరఫున కృతజ్ఞతలు తెలియజేశారు. క్యాంపు నిర్వహణలో కోఆర్డినేటర్ పి. సతీష్, పుష్ప, కరుణ, చిట్టి రాణి, ప్రమీల, శ్రీదేవి, అప్పారావు, కొండమ్మ స్వర్ణలత, మణి పాల్గొన్నారు.
