హైదరాబాద్

హైదరాబాద్‌లో దేశంలోనే అతిపెద్ద AI డేటా సెంటర్

హైదరాబాద్‌లో దేశంలోనే అతిపెద్ద ఏఐ డేటా సెంటర్ క్యాంపస్ ఏర్పాటుకు టీసీఎస్ అనుబంధ హైపర్‌వాల్ట్ తెలంగాణ ప్రభుత్వంతో ఒప్పందం కుదుర్చుకుంది. 250 ఎకరాలకు పైగా విస్తీర్ణంలో 1 గిగావాట్ సామర్థ్యంతో నిర్మించే ఈ ప్రాజెక్టుకు సుమారు రూ.70 వేల కోట్ల పెట్టుబడి పెట్టనున్నారు. ప్రత్యక్షంగా, పరోక్షంగా 7 వేల మందికి ఉద్యోగాలు లభించనున్నాయి. ముఖ్యమంత్రి రేవంత్‌రెడ్డితో టీసీఎస్–హైపర్‌వాల్ట్ ప్రతినిధులు సమావేశమై ప్రాజెక్టు వివరాలు వెల్లడించారు. అత్యాధునిక కంప్యూటింగ్ వ్యవస్థలు, లిక్విడ్ కూలింగ్, గ్రీన్ ఎనర్జీ, వాటర్-న్యూట్రల్ డిజైన్‌తో క్యాంపస్‌ను అభివృద్ధి చేయనున్నారు. ప్రపంచస్థాయి ఏఐ కంపెనీలు, హైపర్‌స్కేలర్లకు భారీ కంప్యూటింగ్ మౌలిక వసతులు అందనున్నాయి. ఫ్యూచర్ సిటీ అభివృద్ధికి ఈ ప్రాజెక్టు బలమైన పునాది అవుతుందని సీఎం పేర్కొన్నారు. విద్యుత్, నెట్‌వర్కింగ్, నిర్మాణం, ఇంజినీరింగ్ రంగాల్లోనూ కొత్త అవకాశాలు ఏర్పడనున్నాయి. తెలంగాణను గ్లోబల్ ఏఐ, డేటా సెంటర్ హబ్‌గా తీర్చిదిద్దడంలో ఇది కీలక ముందడుగుగా నిలవనుంది