వార్డులు పెంచారు.. వసతులు లేవు సమస్యలు పరిష్కరించాలి: సీపీఐ

నంద్యాల పట్టణంలో వార్డుల సంఖ్యను 42 నుంచి 52కు పెంచినా మౌలిక వసతులు మాత్రం మెరుగుపడలేదని సీపీఐ పట్టణ కార్యదర్శి కె. ప్రసాద్ విమర్శించారు. సీపీఐ కార్యాలయంలో నిర్వహించిన విలేకరుల సమావేశంలో ఆయన మాట్లాడారు.పట్టణంలోని పలు ప్రాంతాల్లో సీసీ రోడ్లు, డ్రైనేజీలు, వీధి దీపాలు లేక ప్రజలు ఇబ్బందులు పడుతున్నారని తెలిపారు. కాలువల్లో పూడిక తొలగించక మురుగునీరు రోడ్లపైకి వస్తోందని, దోమలు, వీధి కుక్కల సమస్యలు తీవ్రంగా ఉన్నాయని పేర్కొన్నారు. పైపులైన్ల కోసం రోడ్లు తవ్వి తిరిగి మరమ్మతులు చేయకపోవడంతో గుంతలు ఏర్పడి ప్రజలకు ఇబ్బందులు కలుగుతున్నాయన్నారు.వార్డుల్లో మౌలిక వసతులు కల్పించి సమస్యలను పరిష్కరించాలని సీపీఐ పట్టణ సమితి డిమాండ్ చేసింది. సమావేశంలో ఏఐవైఎఫ్ జిల్లా కార్యదర్శి జి. నాగరాముడు, సీపీఐ పట్టణ సహాయ కార్యదర్శి లక్ష్మీదేవి, ఏఐటీయూసీ పట్టణ అధ్యక్షుడు డి. శ్రీనివాసులు, మహిళా సమైక్య పట్టణ కార్యదర్శి సుశీలమ్మ పాల్గొన్నారు.