పెళ్లి పీటలపై గిరిజన ఆడపడుచుకు ‘పెద్దన్న’ అండ!

రూ.10,116 నగదు.. పట్టు వస్త్రాలతో వివాహ కానుక వధూవరులను ఆశీర్వదించిన కంచి పరమేశ్వర రెడ్డి ఆత్మకూరు, సెప్టెంబర్ 28 (పున్నమి ప్రతినిధి): గిరిజన ఆడపడుచుల వివాహాలకు అండగా నిలుస్తూ శ్రీ సాంబశివ చారిటబుల్ ట్రస్ట్ సేవా కార్యక్రమాలను కొనసాగిస్తోంది. ఆత్మకూరు మున్సిపాలిటీ 2వ వార్డు వెంకట్రావుపల్లి ఎస్టీ కాలనీకి చెందిన బొమ్మ ఉమాదేవి వివాహానికి ట్రస్ట్ చైర్మన్ కంచి పరమేశ్వర రెడ్డి పెద్దదిక్కుగా నిలిచారు. ‘గిరిజన ఆడపడుచులకు పెళ్లి కానుక’ కార్యక్రమంలో భాగంగా రూ.10,116 నగదు చెక్కుతో పాటు నూతన పట్టు వస్త్రాలను స్వయంగా అందజేసి వధూవరులను ఆశీర్వదించారు. తమ కుమార్తె వివాహానికి తండ్రి స్థానంలో నిలిచి ఆర్థిక సాయం చేయడంతో ఉమాదేవి కుటుంబ సభ్యులు భావోద్వేగానికి లోనై కృతజ్ఞతలు తెలిపారు. గిరిజన ప్రాంతాల్లో బాల్య వివాహాల నివారణకు అవగాహన కల్పించడమే ఈ కార్యక్రమం లక్ష్యమని పరమేశ్వర రెడ్డి తెలిపారు. ఆత్మకూరు ప్రభుత్వ వైద్యశాలలో అన్నప్రసాద కార్యక్రమాలను కూడా ట్రస్ట్ కొనసాగిస్తోంది.