వయసు చిన్నదే… సేవా స్ఫూర్తి మాత్రం పెద్దది! రక్తదానం నుంచి అన్నదానం వరకు.. ఆపదలో ఉన్నవారికి అండగా సాజిద్ గాజులపేట ప్రభుత్వ పాఠశాల విద్యార్థి నుంచి మానవతా సేవకుడిగా ఎదుగుతున్న యువకుడు

నిర్మల్ జిల్లా సెప్టెంబర్ 13 (పున్నమి ప్రతినిధి) నిర్మల్: వయసు చిన్నదైనా ఆలోచనలు మాత్రం విశాలంగా ఉండాలనే మాటకు నిలువెత్తు నిదర్శనంగా నిలుస్తున్నారు యువ కార్యకర్త సాజిద్. సమాజం పట్ల బాధ్యత, మానవతా దృక్పథంతో సేవా కార్యక్రమాల్లో చురుగ్గా పాల్గొంటూ తనకంటూ ప్రత్యేక గుర్తింపు తెచ్చుకుంటున్నారు. రక్తం అవసరమైన వారికి బ్లడ్ బ్యాంకుల ద్వారా రక్తదానం, రక్తం అందించే విషయంలో సహకారం, నిరాశ్రయులు, ఆపదలో ఉన్న వారికి అన్నదానం, ఆహార సహాయం అందించడంలో సాజిద్ ముందుంటున్నారు. ఎవరికి కష్టం వచ్చినా తన వంతు సహాయం చేయాలనే ఆలోచనతో ముందుకు సాగుతూ యువతకు ఆదర్శంగా నిలుస్తున్నారు. కేవలం సేవా కార్యక్రమాలకే పరిమితం కాకుండా మానవ హక్కుల పరిరక్షణ కోసం హ్యూమన్ రైట్స్ కమిటీ కార్యక్రమాల్లో కూడా చురుగ్గా పాల్గొంటూ, ప్రజల సమస్యలు, హక్కులపై అవగాహన కల్పించేందుకు తన వంతు కృషి చేస్తున్నారు. చదువుకున్న పాఠశాల నుంచే అభినందన.. నిర్మల్‌లోని గాజులపేట ప్రభుత్వ పాఠశాలలో చదువుకున్న సాజిద్, తాను విద్యనభ్యసించిన పాఠశాలకు తన సేవా కార్యక్రమాలతో మంచి పేరు తీసుకురావడం గర్వకారణంగా మారింది. సాజిద్ చేస్తున్న సామాజిక సేవలను గుర్తించిన పాఠశాల యాజమాన్యం ఆయనను సన్మానించడం విశేషంగా నిలిచింది. తాను చదువుకున్న పాఠశాల నుంచే సన్మానం అందుకోవడం తనకు ఎంతో గర్వకారణమని, భవిష్యత్తులో కూడా సమాజానికి మరింత సేవ చేయాలనే సంకల్పంతో ముందుకు సాగుతానని సాజిద్ తెలిపారు. వయసుతో కాదు.. మనసుతో గొప్పతనం వస్తుందనే విషయాన్ని తన సేవల ద్వారా చాటుతున్న సాజిద్, యువతలో సామాజిక బాధ్యతను పెంపొందించేలా ముందుకు సాగుతున్నారు. ఆపదలో ఉన్నవారికి అండగా నిలవడం, అవసరమైన వారికి సహాయం చేయడం తన బాధ్యతగా భావిస్తూ కొనసాగుతున్న ఆయన సేవా ప్రయాణం పలువురి ప్రశంసలు అందుకుంటోంది.