మన తిరుపతి ప్రెస్ క్లబ్ మరో సామాజిక సేవ కార్యక్రమానికి శ్రీకారం.

పుస్తక పఠనమే విజ్ఞానానికి పునాది… తిరుపతి టౌన్ డీఎస్పీ కార్యాలయానికి రూ.10 వేల విలువైన పుస్తకాల విరాళం తిరుపతి, ఆగస్టు 04 (పున్నమి ప్రతినిధి) తిరుపతిలో పుస్తక పఠన సంస్కృతిని ప్రోత్సహించేందుకు మన తిరుపతి ప్రెస్ క్లబ్ మరో సామాజిక సేవా కార్యక్రమాన్ని చేపట్టింది. క్లబ్ అధ్యక్షుడు గొడ్డిండ్ల వెంకటేశ్వర్లు నాయకత్వంలో, తిరుపతి టౌన్ డీఎస్పీ కార్యాలయానికి రూ.10,000 విలువైన వివిధ రకాల పుస్తకాలను మంగళవారం ఉదయం 11:30 గంటలకు విరాళంగా అందజేశారు. ప్రస్తుతం సాంకేతిక యుగంలో మొబైల్ ఫోన్ల వినియోగం రోజురోజుకూ పెరుగుతున్న నేపథ్యంలో, పుస్తక పఠనం అలవాటు క్రమంగా తగ్గిపోతోంది. ఈ పరిస్థితుల్లో డీఎస్పీ కార్యాలయానికి వచ్చే పిటిషనర్లు తమ వంతు సమయాన్ని సద్వినియోగం చేసుకునేలా, అలాగే విధులు నిర్వహించే పోలీసు సిబ్బంది విజ్ఞానాన్ని పెంపొందించుకునేలా ఈ పుస్తకాలను అందజేసినట్లు క్లబ్ ప్రతినిధులు తెలిపారు. ఈ సందర్భంగా తిరుపతి టౌన్ డీఎస్పీ ఎం. భక్తవత్సలం కార్యాలయంలో ఏర్పాటు చేసిన కార్యక్రమంలో పుస్తకాలను అందజేశారు. పుస్తక పఠనం వ్యక్తిత్వ వికాసానికి, ఆలోచనా పరిధి విస్తరణకు, సమాజాభివృద్ధికి ఎంతో దోహదపడుతుందని, ప్రతి ఒక్కరూ రోజువారీ జీవితంలో కొంత సమయాన్ని పుస్తకాల కోసం కేటాయించాలని క్లబ్ ప్రతినిధులు పేర్కొన్నారు. సామాజిక బాధ్యతను దృష్టిలో ఉంచుకుని విద్య, విజ్ఞానం, పఠన సంస్కృతి, ప్రజా చైతన్య కార్యక్రమాలకు తమ సంస్థ ఎల్లప్పుడూ ప్రాధాన్యం ఇస్తుందని తెలిపారు. భవిష్యత్తులో కూడా పాఠశాలలు, ప్రభుత్వ కార్యాలయాలు, ప్రజా సంస్థల్లో ఇలాంటి పుస్తక విరాళ కార్యక్రమాలను మరింత విస్తృతంగా నిర్వహించనున్నట్లు వెల్లడించారు. ఈ కార్యక్రమంలో మన తిరుపతి ప్రెస్ క్లబ్ ఫౌండర్ ప్రెసిడెంట్ తపసి మురళి రెడ్డి, వైస్ ప్రెసిడెంట్ పొన్నా రవి కుమార్, ఆఫీస్ మేనేజర్ అనిల్, మోహనచారి, యోగీశ్వర్, క్లబ్ సభ్యులు, అలాగే తిరుపతి టౌన్ డీఎస్పీ కార్యాలయ సిబ్బంది నాగరాజ్, సునీల్ పాల్గొని కార్యక్రమాన్ని విజయవంతం చేశారు.