ప్రజల ఉద్యమాలను అణచివేయాలని చూస్తే సహించము – ఫార్మా సిటీ బాధితుల ఆగ్రహం
పున్నమి న్యూస్
30 మే2026
తెలంగాణ ఇంచార్జి
హైదరాబాద్ ధర్నా చౌక్ వద్ద ఫార్మా సిటీ బాధిత గ్రామాల ప్రజలు నిర్వహించిన నిరసన కార్యక్రమంలో ప్రభుత్వ తీరుపై తీవ్ర స్థాయిలో విమర్శలు వెల్లువెత్తాయి. ప్రజల భూములు కాజేసి, గ్రామాలను నాశనం చేసి, ఉద్యమాలను అణచివేయడానికి ప్రయత్నిస్తున్నారని బాధితులు మండిపడ్డారు. “ప్రతిపక్షంలో ఉన్నప్పుడు మా భూములు కాపాడతామన్నారు… అధికారంలోకి వచ్చిన తర్వాత మాత్రం మాట తప్పారు” అంటూ నాయకులపై ఆగ్రహం వ్యక్తం చేశారు.
ఫార్మా సిటీ, ఫోర్త్ సిటీ పేర్లతో వేలాది ఎకరాల రైతుల భూములను బలవంతంగా స్వాధీనం చేసుకోవడానికి ప్రయత్నిస్తున్నారని, ఈ ప్రాజెక్టుల వల్ల రైతులు, కూలీలు, పేద ప్రజల జీవనాధారం పూర్తిగా దెబ్బతింటుందని నిరసనకారులు తెలిపారు. భూములు కోల్పోయిన కుటుంబాలు ఇప్పటికీ న్యాయం కోసం తిరుగుతున్నా ప్రభుత్వం స్పందించడం లేదని ఆరోపించారు.
ఈ సందర్భంగా ఏర్పాటు చేసిన ఫ్లెక్సీలు, పోస్టర్లు ప్రజల దృష్టిని ఆకర్షించాయి. “ప్రతిపక్షంలో ఉన్నప్పుడు మా భూములు కాపాడతామన్నారు… ఫార్మా సిటీ దుర్మార్గం అన్నారు… కనబడుట లేదు” అంటూ ప్రభుత్వ పెద్దలపై తీవ్ర విమర్శలు చేశారు. ఎన్నికల ముందు ఇచ్చిన హామీలు ఇప్పుడు ఎక్కడికి పోయాయని ప్రశ్నించారు.
యాచారం మండలం సహా ఫార్మా సిటీ ప్రభావిత గ్రామాల ప్రజలు పెద్ద ఎత్తున ఈ నిరసనలో పాల్గొన్నారు. మహిళలు, రైతులు, యువకులు నినాదాలతో ధర్నా చౌక్ మార్మోగించారు. భూములు కోల్పోయిన ప్రజలకు పూర్తి న్యాయం జరిగే వరకు పోరాటం ఆపేది లేదని హెచ్చరించారు.
ప్రభుత్వం వెంటనే ఫార్మా సిటీ ప్రాజెక్టును రద్దు చేసి, రైతుల భూములను తిరిగి ఇవ్వాలని డిమాండ్ చేశారు. ప్రజల జీవితాలతో ఆడుకుంటూ అభివృద్ధి పేరుతో భూములు లాక్కోవడం ఆపాలని స్పష్టం చేశారు. లేకపోతే రాష్ట్రవ్యాప్తంగా ఉద్యమాన్ని మరింత ఉధృతం చేస్తామని ఫార్మా సిటీ వ్యతిరేక పోరాట సమితి నేతలు హెచ్చరించారు.
