హిందీ పరీక్షల్లో తొండమనాడు విద్యార్థుల ఘనత-100 కి 98 మార్కులతో రికార్డు!

శ్రీకాళహస్తి, ఏప్రిల్ 18 (పున్నమి న్యూస్) ఆంధ్రప్రదేశ్ హిందీ ప్రచార సభ (హైదరాబాద్) ఇటీవల నిర్వహించిన హిందీ పరీక్షల్లో తొండమనాడు జిల్లా పరిషత్ ఉన్నత పాఠశాల విద్యార్థులు తమ ప్రతిభతో జయకేతనం ఎగురవేశారు. ఫిబ్రవరి 14, 15 తేదీల్లో ఆర్పీబీఎస్ బాలుర ఉన్నత పాఠశాల కేంద్రంగా జరిగిన ప్రథమ, మధ్యమ స్థాయి పరీక్షల్లో ఈ పాఠశాల విద్యార్థులు అద్భుత మార్కులు సాధించి మొదటి మూడు స్థానాలను కైవసం చేసుకున్నారు. పాఠశాలకు చెందిన వింధ్య, వంశీ, యోషిత అనే విద్యార్థులు 100 మార్కులకు గాను 98 మార్కులు సాధించి ప్రథమ స్థానంలో నిలిచి అందరి ప్రశంసలు అందుకున్నారు. అలాగే గీతిక, మోక్షాయిని 93 మార్కులతో ద్వితీయ, తృతీయ స్థానాలను దక్కించుకున్నారు. కేవలం టాప్ ర్యాంకులే కాకుండా, ఈ పరీక్షలకు హాజరైన వారిలో మొత్తం 25 మంది విద్యార్థులు ప్రథమ శ్రేణి (ఫస్ట్ క్లాస్)లో ఉత్తీర్ణత సాధించడం విశేషం. అసాధారణ ప్రతిభ కనబరిచిన విద్యార్థులను పాఠశాల ప్రధానోపాధ్యాయులు జి. కృష్ణయ్య ప్రత్యేకంగా అభినందించి, వారికి ధ్రువపత్రాలను అందజేశారు. విద్యార్థులను ఇంతటి ప్రతిభావంతులుగా తీర్చిదిద్దిన హిందీ ఉపాధ్యాయురాలు పద్మావతి, ఉపాధ్యాయులు నాగరాజ్‌లను ఆయన అభినందించారు. విద్యార్థుల ఈ విజయంతో పాఠశాలలో పండగ వాతావరణం నెలకొంది.