తిరుమల, సెప్టెంబర్ 26, 2026:
శ్రీవారి రూ.300 ప్రత్యేక ప్రవేశ దర్శనం టికెట్ల ఆన్లైన్ బుకింగ్పై భక్తుల్లో వ్యక్తమవుతున్న సందేహాలకు టీటీడీ వివరణ ఇచ్చింది. టికెట్లకు భారీ డిమాండ్ ఉండటం వల్లే బుకింగ్ సమయంలో తీవ్ర పోటీ నెలకొంటోందని తెలిపింది. ఆన్లైన్ బుకింగ్ వ్యవస్థ పటిష్టంగా పనిచేస్తోందని స్పష్టం చేసింది.
భారీ సంఖ్యలో భక్తులు ఒకేసారి టికెట్ల కోసం ప్రయత్నించే సమయంలో Google Cloud Platform (GCP), Load Balancing, Auto Scaling, Distributed Application Architecture, Horizontal Scaling వంటి ఆధునిక సాంకేతిక పరిజ్ఞానాన్ని టీటీడీ వినియోగిస్తున్నట్లు పేర్కొంది.
📊 కోటాతో పోలిస్తే దాదాపు 9 రెట్లు అధిక డిమాండ్
అధిక డిమాండ్ సమయంలో సుమారు 6 లక్షల మంది యూజర్లు టికెట్ల కోసం ప్రయత్నించే అవకాశం ఉందని టీటీడీ తెలిపింది. ఒక్కో యూజర్ సగటున నలుగురు కుటుంబ సభ్యుల కోసం టికెట్లు ప్రయత్నిస్తే సుమారు 24 లక్షల టికెట్లకు డిమాండ్ ఏర్పడే అవకాశం ఉందని వివరించింది.
అయితే అందుబాటులో ఉన్న కోటా సుమారు 2.69 లక్షల టికెట్లు మాత్రమే కావడంతో, కోటాతో పోలిస్తే డిమాండ్ దాదాపు 9 రెట్లు అధికంగా ఉంటుందని తెలిపింది. దీంతో ఒకే స్లాట్ కోసం వేలాది మంది ఒకేసారి ప్రయత్నించడం వల్ల టికెట్లు చాలా తక్కువ సమయంలోనే పూర్తవుతున్నాయని వివరించింది.
💻 వర్చువల్ క్యూ ద్వారా ట్రాఫిక్ నియంత్రణ
భారీ సంఖ్యలో అభ్యర్థనలు వచ్చినప్పుడు బ్యాక్ఎండ్ వ్యవస్థలపై అధిక భారం పడకుండా Virtual Queue విధానాన్ని ఉపయోగిస్తున్నట్లు టీటీడీ తెలిపింది. ఇది భక్తులకు టికెట్లు నిరాకరించేందుకు ఉద్దేశించినది కాదని, అధిక ట్రాఫిక్ను క్రమబద్ధీకరించేందుకు ఉపయోగించే సాంకేతిక విధానమని స్పష్టం చేసింది.
అధిక డిమాండ్ కారణంగా టికెట్లు త్వరగా పూర్తయిన సందర్భాల్లో ‘Slot Unavailable’ వంటి సందేశాలు కనిపించవచ్చని, దీనిని మాత్రమే ఆధారంగా చేసుకుని సాంకేతిక వైఫల్యంగా భావించరాదని పేర్కొంది.
💳 చెల్లింపుల ప్రక్రియలో పలు వ్యవస్థలు
ఆన్లైన్ చెల్లింపుల ప్రక్రియ టీటీడీ అప్లికేషన్తో పాటు Payment Gateways, Banking Networks, UPI Networks వంటి బాహ్య వ్యవస్థలపై కూడా ఆధారపడి ఉంటుందని టీటీడీ వివరించింది.
ఏదైనా లావాదేవీ విఫలమైనప్పుడు సమస్య ఏ దశలో ఏర్పడిందో పరిశీలించాల్సి ఉంటుందని తెలిపింది. టికెట్ లభించకపోవడాన్ని, ఆన్లైన్ బుకింగ్ వ్యవస్థ పనిచేయకపోవడాన్ని ఒకటిగా పరిగణించరాదని స్పష్టం చేసింది.
🔐 సాంకేతిక వ్యవస్థలను మరింత బలోపేతం
భక్తుల ఫీడ్బ్యాక్ను పరిగణనలోకి తీసుకుని ఆన్లైన్ బుకింగ్, అప్లికేషన్, డేటాబేస్ పనితీరు, హై-లోడ్ హ్యాండ్లింగ్, సెక్యూరిటీ, యాంటీ-బాట్ మెకానిజమ్స్, పేమెంట్ ప్రక్రియలు తదితర అంశాల్లో నిరంతరం సాంకేతిక అభివృద్ధి చేపడుతున్నట్లు టీటీడీ తెలిపింది.
గతంలో నమోదైన ట్రాఫిక్ విధానాలు, భవిష్యత్ బుకింగ్లలో ఉండే అంచనా డిమాండ్ ఆధారంగా Capacity Planning, Infrastructure Scalingను కూడా సమీక్షిస్తున్నట్లు పేర్కొంది.
🙏 సోషల్ మీడియాలో అసత్య ప్రచారాన్ని నమ్మవద్దని విజ్ఞప్తి
శ్రీ పద్మావతి అమ్మవారి ఆలయం, శ్రీ కల్యాణ వెంకటేశ్వర స్వామి ఆలయం, శ్రీ గోవిందరాజ స్వామి ఆలయం తదితర ఆలయాల దర్శన, సేవా కోటాలను కూడా ఇదే ఆన్లైన్ విధానం ద్వారా విడుదల చేస్తున్నట్లు టీటీడీ తెలిపింది.
భారీ డిమాండ్ ఉన్న సమయంలో ప్రతి బుకింగ్ ప్రయత్నం విజయవంతం కావడం సాధ్యం కాదని, ఒక ప్రయత్నంలో టికెట్ లభించకపోవడాన్ని మాత్రమే ఆధారంగా చేసుకుని ఆన్లైన్ వ్యవస్థలో సాంకేతిక లోపం ఉందని భావించవద్దని భక్తులను కోరింది.
ఆన్లైన్ బుకింగ్ సేవలను సురక్షితంగా, పారదర్శకంగా, సాంకేతికంగా సమర్థవంతంగా అందించేందుకు అవసరమైన చర్యలు కొనసాగుతున్నాయని టీటీడీ తెలిపింది. టీటీడీపై సోషల్ మీడియాలో జరుగుతున్న అసత్య ప్రచారాన్ని నమ్మవద్దని భక్తులకు విజ్ఞప్తి చేసింది.
టీటీడీ ముఖ్య ప్రజా సంబంధాల అధికారి కార్యాలయం ద్వారా ఈ ప్రకటన విడుదలైంది