రీసర్వే పారదర్శకంగా, ఎలాంటి ఇబ్బందులు లేకుండా నిర్వహించాలి – తహసీల్దార్ సూచనలు
మరిపెడ మండలం బురాన్‌పురం గ్రామంలో చేపట్టిన పట్టా భూముల రీసర్వే ప్రక్రియను మరిపెడ మండల తహసీల్దార్ కృష్ణవేణి తో పాటు ఆర్ఐ వీరలక్ష్మి పరిశీలించారు. ఈ సందర్భంగా క్షేత్రస్థాయిలో జరుగుతున్న సర్వే పనులను ఆమె నిశితంగా పరిశీలించి, భూములకు సంబంధించిన వివరాలు, హద్దులు, రికార్డులను క్షుణ్ణంగా తనిఖీ చేశారు. రీసర్వే ప్రక్రియలో ఎలాంటి తప్పిదాలకు తావులేకుండా, పూర్తి పారదర్శకతతో, నిష్పక్షపాతంగా సర్వే నిర్వహించాలని సంబంధిత సిబ్బందికి సూచించారు.
ఈ రీసర్వే ప్రక్రియలో గ్రామపంచాయతీ పరిపాలన అధికారి రమేష్‌తో పాటు తెలంగాణ ప్రభుత్వ లైసెన్స్‌డ్ సర్వేయర్లు భుక్య రాము నాయక్, బాదావత్ శివకుమార్ పట్టా భూముల సర్వే నిర్వహించారు. సర్వేలో భాగంగా భూముల విస్తీర్ణం, సరిహద్దులు, క్షేత్రస్థాయి పరిస్థితులను పరిశీలిస్తూ సంబంధిత భూ వివరాలను నమోదు చేశారు.
ఈ సందర్భంగా తహసీల్దార్ కృష్ణవేణి మాట్లాడుతూ రీసర్వే ప్రక్రియ రైతులకు ఎలాంటి ఇబ్బందులు కలగకుండా సజావుగా కొనసాగాలని సూచించారు. పట్టాదారుల భూముల వివరాలను సంబంధిత రికార్డులతో సరిపోల్చి పరిశీలించాలని, సరిహద్దుల విషయంలో స్పష్టత పాటించాలని తెలిపారు. పక్కపక్కన ఉన్న పట్టా భూముల రైతుల మధ్య ఎలాంటి అపోహలు, వివాదాలు తలెత్తకుండా పరస్పర సహకారంతో సర్వే ప్రక్రియకు సహకరించాలని రైతులకు సూచించారు.
గ్రామపంచాయతీ సిబ్బంది నన్నయ్య, వెంకటాద్రి, ఉపేందర్ తదితరులు సర్వే ప్రక్రియలో పాల్గొన్నారు. అధికారులు, సర్వేయర్లు, గ్రామపంచాయతీ సిబ్బంది సమన్వయంతో పనిచేస్తూ రీసర్వేను విజయవంతంగా పూర్తి చేయాలని, రైతులకు వారి భూముల వివరాలపై స్పష్టత కల్పించేలా చర్యలు తీసుకోవాలని తహసీల్దార్ సూచించారు.
వార్తా మూలాలు
- Punnami Reportingసొంత రిపోర్టింగ్
