పున్నమి న్యూస్ బోగోలు మండలం రిపోర్టర్ గోపాలకృష్ణారెడ్డి
బోగోలు మండలం, చెంచులక్ష్మీపురం గ్రామంలో నెలకొన్న ప్రజా సమస్యలను పరిష్కరించేందుకు సంబంధిత అధికారులు తక్షణమే స్పందించాలని గ్రామస్థులు కోరుతున్నారు. చెంచులక్ష్మీపురంలోని రాములవారి గుడి వద్ద చిన్నపాటి వర్షానికే మురుగునీరు నిలిచిపోవడంతో పాటు, అదే బజారులో పై వైపు కూడా మురుగునీరు పేరుకుపోతోంది. దీంతో స్థానికులు తీవ్ర ఇబ్బందులు ఎదుర్కొంటున్నారు. పారిశుద్ధ్య లోపం కారణంగా దోమల వ్యాప్తి పెరిగి, వర్షాకాలంలో డెంగ్యూ, మలేరియా వంటి సీజనల్‌ వ్యాధులు ప్రబలే ప్రమాదం ఉందని గ్రామస్థులు ఆందోళన వ్యక్తం చేస్తున్నారు.
కాలువ మధ్యలో ప్రమాదకరంగా విద్యుత్ స్తంభం.
ఇదే ప్రాంతంలోని కాలువ మధ్యలో ఉన్న విద్యుత్ స్తంభం కూలిపోయే స్థితిలో ఉండటంతో ప్రమాదం పొంచి ఉందని స్థానికులు ఆందోళన చెందుతున్నారు. ఎలాంటి అవాంఛనీయ ఘటన జరగకముందే విద్యుత్ శాఖ అధికారులు స్పందించి, ప్రమాదకరంగా ఉన్న స్తంభాన్ని తొలగించి దాని స్థానంలో కొత్త విద్యుత్ స్తంభాన్ని ఏర్పాటు చేయాలని కోరుతున్నారు.
మురుగునీటి సమస్యకు శాశ్వత పరిష్కారం ఏదీ?
రాములవారి గుడి పరిసరాలతో పాటు , అదే బజారులో పై వైపు నిల్వ ఉంటున్న మురుగునీరు సక్రమంగా బయటకు వెళ్లేలా డ్రైనేజీ వ్యవస్థను మెరుగుపరచాలని గ్రామస్థులు విజ్ఞప్తి చేస్తున్నారు. కేవలం తాత్కాలిక చర్యలతో సరిపెట్టకుండా, మురుగునీటి నిల్వకు శాశ్వత పరిష్కారం చూపాలని కోరుతున్నారు.
ప్రజల ఆరోగ్యం, భద్రతకు సంబంధించిన ఈ సమస్యలపై పంచాయతీ, పారిశుద్ధ్య, విద్యుత్ శాఖ అధికారులు సమన్వయంతో స్పందించి తక్షణ చర్యలు చేపట్టాలని గ్రామస్థులు డిమాండ్‌ చేస్తున్నారు. వర్షాకాలంలో వ్యాధుల వ్యాప్తిని అరికట్టడంతో పాటు విద్యుత్ ప్రమాదాలను నివారించేందుకు ముందస్తు చర్యలు తీసుకోవాలని విజ్ఞప్తి చేస్తున్నారు.
